Dərmanların düzgün saxlanılmaması, xüsusilə mətbəxdə və ya hamam otağında yerləşdirilməsi onların təsirini itirməsinə, hətta sağlamlıq üçün zərərli olmasına səbəb ola bilər.

AVESTA.AZ-in məlumtına görə, bu barədə "gazeta.ru"ya açıqlamasında tibb elmləri doktoru, professor, Rusiya Elmlər Akademiyasının müxbir üzvü Olqa Tkaçova bildirib.

Onun sözlərinə görə, xüsusilə yaşlı insanlar unutqanlıq səbəbindən dərmanları tez-tez stolun üzərində, hamamda və ya mətbəxdə saxlayırlar. Halbuki bu məkanlarda yüksək temperatur, rütubət və buxar dərmanların tərkibini tədricən dəyişir.

"İstənilən dərman preparatı təlimata uyğun saxlanılmadıqda faydasız, hətta zərərli ola bilər. Yüksək rütubət, istilik və birbaşa günəş şüaları təsiredici maddələri məhv edir", – deyə həkim əlavə edib.

Tkaçova həmçinin qeyd edib ki, istifadə müddəti bitmiş və ya rəngi, qoxusu, konsistensiyası dəyişmiş dərmanlar mütləq utilizasiya edilməlidir. Lakin bir çox yaşlı insanlar buna laqeyd yanaşırlar.

"Zədələnmiş və ya yararsız dərmanların təsadüfən qəbulunun qarşısını almaq üçün ev aptekində mütəmadi yoxlama aparmaq və vaxtı keçmiş, şübhəli preparatları atmaq vacibdir. Dərmanlar üçün ayrıca dolab və ya aptek qutusu ayırın. Onları hamamda, mətbəxdə və ya pəncərə kənarında saxlamayın. Ən uyğun yer – quru, sərin və birbaşa işıqdan qorunan məkandır. Əgər qablaşdırmada "soyuqda saxlayın" qeyd olunubsa, dərmanı soyuducuya yerləşdirin, lakin dondurmayın. Həblər tam istifadə olunana qədər öz blisterində və flakonunda saxlanmalıdır. Müxtəlif dərmanları bir flakona yığmayın – bu, onları qarışdırmaq riskini artırır. İstifadə müddətlərini mütəmadi yoxlayın və dərmanların vəziyyətinə nəzarət edin", – deyə həkim vurğulayıb.