Hazırda kanalizasiya sistemi olmayan ərazilər Bakıətrafı kənd və qəsəbələri, Abşeron rayonunun coğrafi baxımdan ucqar olan və fərdi yaşayış üçün nəzərdə tutulmayan məskənlərini, o cümlədən Maştağa, Ramana, Binə, Qala, Zirə, Türkan, Dübəndi, Gürgan və Hövsan qəsəbələrini əhatə edir.

AVESTA.AZ xəbər verir ki, bu barədə "Trend"in sorğusuna cavab olaraq Azərbaycan Dövlət Su Ehtiyatları Agentliyi (ADSEA) məlumat verib.

Bildirilib ki, bəzi ərazilərdə mövcud kanalizasiya şəbəkələri düzgün istismar olunmur:

"Binəqədi rayonunun elə əraziləri var ki, orada məskunlaşan əhali primitiv şəbəkələrdən istifadə edir. Bununla yanaşı, həmin şəbəkələr sakinlər tərəfindən düzgün istismar olunmur, xətlərə müxtəlif məişət tullantıları atılır. Bütün bu problemlərin qarşısının alınması məqsədilə iri şəhərlərin ərazilərində yeni, müasir tələblərə cavab verən tullantı su şəbəkələrinin qurulması nəzərdə tutulur. Konkret olaraq, su təchizatının və tullantı sularının idarə edilməsinin vətəndaş məmnuniyyətini yüksəldəcək səviyyədə təşkil olunması ilə bağlı İlham Əliyev tərəfindən Dövlət Proqramı imzalanıb".

İlkin mərhələdə işlərə hansı ərazilərdən başlanacağı məsələsinə də aydınlıq gətirilib:

"Dövlət Proqramının icrası hazırda yağıntılar zamanı subasma halları müşahidə olunan Zabrat, Buzovna, Suraxanı və digər yaşayış məntəqələrində kanalizasiya və yağış suları infrastrukturunun mərhələli şəkildə qurulmasına və yenilənməsinə imkan verəcək. Bu çərçivədə yeni kollektorlar və nasos stansiyaları tikiləcək, mövcud xətlərin buraxılış qabiliyyəti artırılacaq. Nəticədə ekoloji vəziyyətin yaxşılaşdırılması, əhalinin həyat və məişət şəraitinin yüksəldilməsi, həmçinin dayanıqlı və təhlükəsiz su təsərrüfatı sisteminin formalaşdırılması təmin ediləcək".

Qeyd olunub ki, yaşayış binalarında istismar müddəti başa çatan tullantı su xətləri mütəmadi olaraq yeniləri ilə əvəzlənir. Dövlət Proqramının tələblərinə uyğun olaraq bu işlər gələcəkdə daha genişmiqyaslı və intensiv şəkildə davam etdiriləcək.