Rusiyada təxminən 840 min miqrant qanunsuz şəkildə yaşayır.

AVESTA.AZ xəbər verir ki, bu barədə Rusiyanın Baş naziri Mixail Mişustin Dövlət Dumasında hökumətin hesabatı zamanı bildirib.

"Fevralın 6-na olan məlumata görə onların sayı təxminən 840 mindir", – deyə o qeyd edib.

Baş nazir xatırladıb ki, ötən il Rusiyada nəzarətdə olan şəxslərin reyestri istifadəyə verilib. Bu, Rusiya Daxili İşlər Nazirliyinin dövlət informasiya bazasıdır və ölkədə qanunsuz yaşayan xarici vətəndaşlar və vətəndaşlığı olmayan şəxslər həmin siyahıya daxil edilir.

Mişustin bildirib ki, bu reyestrə düşən şəxslərin hərəkət azadlığı, nəqliyyat vasitələrini idarə etmək hüququ, nikah bağlama imkanları və bir sıra bank xidmətlərindən istifadə hüquqları məhdudlaşdırılıb.

Baş nazir əlavə edib ki, 2025-ci ildən indiyədək 72 min nəfər ölkədən deportasiya olunub.

Fevralın 25-də Dövlət Dumasının sədri Vyaçeslav Volodin bəyan edib ki, Rusiyada qanunsuz miqrasiyaya qarşı mübarizə sahəsində hüquqi baza artıq formalaşdırılıb. Onun sözlərinə görə, bu istiqamətdə 22 qanun qəbul edilib və onlardan 21-i artıq qüvvəyə minib.