Premyer Liqanın 2 klubu 2023/2024 mövsümündə avrokuboklarda iştirak üçün AFFA-ya müraciət etməyib.

Bu barədə “AVESTA.AZ”a AFFA Lisenziyalaşdırma qrupunun rəhbəri Elçin Məmmədov məlumat verib.

O bildirib ki, elitada mübarizə aparan 10 klub növbəti mövsüm Premyer Liqada iştirak üçün müraciət etsə də, avrokuboklarla bağlı heç də hamısı müsbət rəy bildirməyib: “Klubların əksəriyyəti avrokuboklar üçün müraciət edib. Konkret adlarını deməyim düzgün çıxmaz. Çünki bu, idman nəticələrinə təsir edə bilər”.

Elçin Məmmədov

Məmmədov əlavə edib ki, 2023/2024 mövsümündən etibarən elitada iştirak üçün meyarların sayı 5-dən 6-ya çatdırılıb: “Buna qədər idman, infrastruktur, kadr inzibati, hüquq və maliyyə meyarlarına əsasən qərarlar verilirdi. UEFA növbəti mövsümdən etibarən yeni meyar tətbiq edib. Bu da futbolda sosial məsuliyyət meyarıdır. Klublar bu sahədə də hansı işləri görəcəklərini göstərməlidirlər. İlk növbədə strategiya yazılmalıdır, irqçiliyə qarşı hansı tədbirlər gördüklərini, fiziki məhdudiyyəti olan şəxslərin futbolda iştirakını necə təmin etdiklərini, ətraf mühitin qorunması yönündə nə kimi işlər apardıqlarını bildirməlidirlər”.

Lisenziyalaşdırma qrupunun rəhbəri Premyer Liqaya qatılmaq üçün müraciət edən I Divizion klublarında treninqlərə başladıqlarını söyləyib: “Region klublarına yerlərdə treninqlər keçiririk. Bakıdakı klublar isə AFFA-ya gəlirlər. Klublarla görüşürük, sənədləri müzakirə edirik. Sənədlərin təqdim olunması üçün son tarix 2023-cü ilin fevralıdır. Ondan sonra sənədləri araşdıracaq, yerlərdə yoxlalamarı aparacağıq. Yekun rəyimizi mayda komissiyaya təqdim edəcəyik”.

Qeyd edək ki, I Diviziondakı 6 klubun hamısı - “Araz Naxçıvan”, “Zaqatala”, “Mingəçevir”, “Qaradağ Lökbatan”, MOİK və “İmişli” növbəti mövsüm Premyer Liqada iştirak üçün müraciət edib.