Ukrayna ordusu Rusiyanın mühüm enerji infrastruktur obyektlərindən biri olan Novorossiysk limanını pilotsuz uçuş aparatları ilə hədəfə alıb.

BAKU.WS xəbər verir ki, hücum nəticəsində limandakı neft terminallarında güclü yanğınlar baş verib və fəaliyyət ciddi şəkildə məhdudlaşıb.

Məlumata görə, Rusiyanın Krasnodar diyarında yerləşən şəhərə edilən hücum zamanı 8 nəfər yaralanıb. Bölgə rəhbəri Veniamin Kondratyev vəziyyəti "son dərəcə ciddi" kimi qiymətləndirib. Onun sözlərinə görə, hücum nəticəsində yaşayış binaları və fərdi evlərə də ziyan dəyib.

Bildirilir ki, limanda baş verən yanğınlar səbəbindən neft daşımaları əhəmiyyətli dərəcədə pozulub. Novorossiysk limanı Rusiyanın xam neft və neft məhsulları ixracında əsas mərkəzlərdən biri hesab olunur.

Ekspertlərin fikrincə, bu obyektin hədəfə alınması Moskva üçün həm iqtisadi, həm də logistika baxımından ciddi nəticələrə səbəb ola bilər. Enerji ixracı Rusiyanın əsas gəlir mənbələrindən biri olduğu üçün hücumun birbaşa maliyyə təsiri olduğu qeyd olunur.

Hadisədən sonra qlobal enerji bazarlarında da narahatlıq artıb. Analitiklər neft təklifində mümkün azalma fonunda qiymətlərin yüksələ biləcəyi ilə bağlı xəbərdarlıq edir.

Qeyd edək ki, paralel olaraq Hörmüz boğazı və Fars körfəzi ətrafında davam edən gərginlik də dünya enerji bazarına təsir göstərməkdə davam edir.