Azərbaycanda nə qədər çox şirkət İSO sertifikatlarını alsa, ölkə üzrə beynəlxalq standartlara uyğun çalışıldığını dəlalət edir.

"Report" xəbər verir ki, bunu "Global Assurance" şirkətinin Keyfiyyət Təminatı və Keyfiyyətə Zəmanət departamentinin direktoru Günel Qureyşi "Global Media Group" MMC-nin şirkətlərinə IMS sertifikatlarının təqdimat mərasimində çıxışı zamanı deyib.

"İlin əvvəlində "Global Media Holding" rəhbərliyinin tapşırığı ilə biz bu standartların alınması üçün müraciət etdik. Bu qərardan sonra şirkətdə standartlaşdırma üzrə uzun bir yolçuluq başladı", - G.Qureyşi bildirib.

Onun sözlərinə görə, Azərbaycanda bəzi şirkətlər İSO 9001 sertifikatına layiq görülüb, lakin media sektorunda bu sertifikatı alan şirkət yoxdur: "Bu bir ilkdir və hər kəsə də maraqlıdır. Bu sertifikatlar 160-dan çox ölkədə 1 milyondan çox şirkət tərəfindən tətbiq edilir. Bütün şərtlər eynidir. Əslində ölkəmizdə nə qədər çox şirkət bu sertifikatları alsa, ölkə üzrə beynəlxalq standartlara uyğun çalışıldığına dəlalət edir. Bu yolda bizə dəstək olan rəhbərliyimizə, xüsusilə Elnur Abdullayevə dərin təşəkkürlərimizi bildiririk".

Qeyd edək ki, “Global Media Group” MMC-nin tərkibində olan şirkətlər - “Report” İnformasiya Agentliyi, “Oxu.Az” xəbər saytı, “Baku TV” yayım portalı və “Global Management” MMC autsorsinq şirkəti ISO-9001, ISO-14001 və ISO-45001 sertifikatlarına layiq görülüb.