Yunanıstanın xarici işlər naziri Yorqos Yerapitritis bildirib ki, Avropa İttifaqı 2027-ci ilin ikinci yarısında yeni üzv qəbul edə bilər.

AVESTA.AZ xarici mətbuata istinadən xəbər verir ki, o, bu açıqlamanı "Delphi Economic Forum" zamanı verib.

Nazir konkret hansı ölkənin üzvlüyə daha yaxın olduğunu açıqlamayıb. Bu səbəbdən ekspertlər arasında mümkün namizədlərlə bağlı müxtəlif ehtimallar müzakirə olunur.

Bundan əvvəl "Politico" nəşri yazmışdı ki, Aİ iqtisadi baxımdan zəif ölkələri qəbul etməkdə tərəddüd edir. Belə ölkələrin ittifaq büdcəsindən daha çox vəsait alacağı, lakin az töhfə verəcəyi ehtimal olunur. Bu kontekstdə Ukrayna tez-tez nümunə kimi göstərilir.

Eyni zamanda Ukrayna prezidenti Volodimir Zelenski hesab edir ki, ittifaq daha güclü ola bilər. Onun fikrincə, Norveç, Ukrayna, Böyük Britaniya və Türkiyə Aİ-yə qoşulsa, birlik yeni güc qazana bilər.

Digər məlumatlara görə, Monteneqro 2028-ci ildə Aİ-nin növbəti üzvlərindən biri ola bilər.