Azərbaycanda geniş yayılmış mina çirklənməsi məcburi köçkünlərin təhlükəsiz qayıdışına, azad olunmuş ərazilərin bərpasına və iqtisadi inkişafa ciddi maneə olaraq qalır.

AVESTA.AZ xəbər verir ki, bunu Azərbaycan Prezidentinin köməkçisi Hikmət Hacıyev "X" sosial şəbəkəsindəki paylaşımında bildirib.

Onun sözlərinə görə, minalar Ermənistan–Azərbaycan münaqişəsinin ən ağır miraslarından biridir və döyüşlər başa çatdıqdan sonra da insan həyatına təhlükə yaratmağa davam edir.

Hikmət Hacıyev qeyd edib ki, 2020-ci il noyabrın 10-dan 2026-cı il iyunun 9-dək Azərbaycanda 264 mina hadisəsi qeydə alınıb. Nəticədə 427 nəfər mina partlayışının qurbanı olub. Onlardan 73-ü həyatını itirib, 354 nəfər isə müxtəlif dərəcəli xəsarətlər alıb.

Prezidentin köməkçisi bildirib ki, mina qurbanları arasında 231 mülki şəxs və 196 hərbçi var. O əlavə edib ki, 1991-ci ildən bəri mina qurbanlarının ümumi sayı 3 500 nəfəri ötüb. Onların arasında 362 uşaq və gənc, həmçinin 38 qadın yer alır.

Hikmət Hacıyev vurğulayıb ki, minatəmizləmə fəaliyyəti yalnız təhlükəsizlik məsələsi deyil, eyni zamanda humanitar zərurət və dayanıqlı yenidənqurma üçün əsas şərtlərdən biridir.