"Azərbaycan Prezidenti İlham Əliyev ölkəmizdə səhiyyə sahəsində idarəetmənin daha da təkmilləşdirilməsi məqsədilə xüsusi Fərman imzalayıb. Hesab edirəm ki, bu sənəd Fərmanda da ətraflı göstərildiyi kimi, Azərbaycan əhalisinə göstərilən tibbi xidmətlərin keyfiyyətinin artırılması, səhiyyə müəssisələrinin maddi-texniki bazasının zənginləşdirilməsi, səhiyyə sistemində idarəetmənin təkmilləşdirilməsi və tibbi xidmətlərə əlçatanlığın daha da asanlaşdırılması sahəsində böyük imkanlar yaradır".

BAKU.WS xəbər verir ki, bunu Oxu.Az-a açıqlamasında Milli Məclisin Səhiyyə komitəsinin üzvü, deputat Məlahət İbrahimqızı deyib.

O bildirib ki, Tibbi Ərazi Bölmələrini İdarəetmə Birliyi (TƏBİB) səhiyyə sahəsində islahatların ilk illərində, xüsusən də icbarı tibbi sığortaya keçidin daha çevik olması, bir sözlə keçid dövrü üçün yaradılıb:

"Hesab edirəm ki, TƏBİB öz işini bitirdi. İndi isə vahid mərkəzləşdirilmiş rəhbərliyin idarəetməsinin tam vaxtı idi və bu da dövlət başçımız tərəfindən həll edildi. Bir daha qeyd edirəm ki, TƏBİB icbari tibbi sığortaya keçid dövrünün daha çevik idarə edilməsində koordinasiyaedici mexanizm idi. Artıq 7-8 ildir ki, ölkədə icbari tibbi sığorta tətbiq edilir və keçid mərhələ yekunlaşıb. Əminik ki, imzalanan bu Fərmanda əks olunan bütün məsələlər uğurla həyata keçiriləcək", - deyə deputat vurğulayıb.