2023-2026-cı illərdə Ortamüddətli Xərclər Çərçivəsinin (OMXÇ) əhatə dairəsinin genişləndirilməsi və yeni pilot sektorların islahata cəlb olunması planlaşdırılır.

"Report" xəbər verir ki, bunu Maliyyə Nazirliyinin Aparatının Ortamüddətli Xərclər Çərçivəsinin Hazırlanması Mərkəzinin direktor müavini Rəşad Həsənov "Təhsil sektorunda OMXÇ-in tətbiqi və nəticə əsaslı büdcə mexanizminə keçid" mövzusunda keçirilən seminarda çıxışı zamanı deyib.

"Bu illər ərzində büdcə intizamının gücləndirilməsi, proqnoz və icra hesabatlarının vaxtında və keyfiyyətli formada təqdim edilməsi, beynəlxalq təşkilatların dəstəyi ilə Maliyyə Nazirliyinin və pilot qurumların OMXÇ-nin tətbiqi və strateji planlaşdırma üzrə potensialının gücləndirilməsinin davam etdirilməsi, OMXÇ-nin və onun təqviminin büdcə prosesinə inteqrasiyası məqsədilə büdcə qanunvericiliyinin təkmilləşdirilməsi, İT həllərin aktiv tətbiqi və OMXÇ-nin hazırlanması və monitorinq proseslərinin avtomatlaşdırılması nəzərdə tutulub", - R.Həsənov bildirib.

Onun sözlərinə görə, 2023-cü ildə OMXÇ-in tətbiqi və nəticə əsaslı büdcə mexanizminə keçidlə bağlı islahatlar çərçivəsində pilot sektorlar üzrə proqram təsnifatının təkmilləşdirilməsi və digər bölgələrdə olan cari və əsaslı xərclərin də mövcud proqramlara əlavə edilməsi, bununla da pilot sektorlar üzrə büdcə xərclərinin tam olaraq OMXÇ-yə və nəticə əsaslı büdcə proqnozlaşdırılmasına cəlb olunması nəzərdə tutulub.

O, bildirib ki, gələn il proqram təsnifatının təkmilləşdirilərək Vahid büdcə təsnifatına inteqrasiya edilməsi və pilot sektorlarla yanaşı digər sektorlarda da tətbiqi planlaşdırılır:

"Nəticə indikatotlarının müəyyən edilməsi ilə bağlı vahid metodoloji təlimatın hazırlanaraq təsdiq üçün təqdim edilməsi və pilot sektorlar üzrə ayrılan vəsaitlərin səmərəliliyiniv effektivliyini daha yaxşı monitorinq etmək və qiymətləndirmək üçün hədəf/nəticə indikatorlarının həmin metodologiyaya uyğun olaraq təkmilləşdirilməsi, onların sayının optimallaşdırılması nəzərdə tutulur. Gələn il pilot sektorlar üzrə digər təşkilatlar tərəfindən hazırlanan fəaliyyət planları həmin sektorlar üzrə aparıcı təşkilatlara təqdim ediləcək və aparıcı qurumlar tərəfindən sektor üzrə ümumi fəaliyyət planlarının icmallaşdırılacaq və Sektor Strateji Plana daxil edilərək Maliyyə Nazirliyinə təqdim ediləcək. Pilot sektorlar üzrə fəaliyyət planları protokollaşdırılarkən büdcə təşkilatları tərəfindən hədəflənən nəticə göstəriciləri xərc proqnozları ilə daha sıx uyğunlaşdırılacaq".

Qeyd edək ki, OMXÇ-nin tətbiqi və nəticə əsaslı büdcə mexanizminə keçidlə bağlı islahatlar üzrə pilot sektorlar olaraq ilkin mərhələdə təhsil, kənd təsərrüfatı və ətraf mühitin mühafizəsi sektorları müəyyən edilib.