Ermənistanın keçmiş prezidenti Armen Sarkisyanın xarici vətəndaşlığı ilə bağlı cinayət işi ölkənin İstintaq Komitəsinə verilib.

“AVESTA.AZ” xəbər verir ki, bu barədə Milli Təhlükəsizlik Xidməti məlumat yayıb.

"Ermənistanın dördüncü prezidenti Armen Sarkisyana qarşı cinayət işi tabelik qaydasında İstintaq Komitəsinə göndərilib", - Milli Təhlükəsizlik Xidmətindən bildirilib.

Bundan əvvəl Milli Təhlükəsizlik Xidməti iş üzrə istintaq hərəkətlərinin aparıldığını xəbər vermişdi.

Xatırladaq ki, Ermənistan prezidenti Armen Sarkisyan ötən il yanvarın 23-də istefa verib. O, bu qərarını lazımi səlahiyyətlərinin olmaması ilə əsaslandırıb. Sarkisyanın sözlərinə görə, bu, prezidentin siyasi proseslərə təsir göstərməsinə imkan vermir.

Ertəsi gün “Hetq.am” saytı Sarkisyanın prezident seçilməzdən əvvəl Karib hövzəsindəki kiçik Sent Kitts və Nevisin vətəndaşlığına malik olması barədə məlumat yayıb. Onun prezident seçilmək hüququ yox idi.

Nəşrin məlumatına görə, Sarkisyan 500 min dollarlıq sərmayə qarşılığında Karib hövzəsindəki Sent-Kits və Nevisin vətəndaşlığını alıb.