ABŞ-ın Nyu-York şəhərində 28 May – Müstəqillik Günü münasibətilə Azərbaycanın dövlət bayrağı qaldırılıb.

"Report"un ABŞ bürosu xəbər verir ki, üç rəngli, ay-ulduzlu bayrağımız Nyu-York şəhərinin simvolu və maliyyə mərkəzi hesab olunan, turistlərin ən çox ziyarət etdiyi küçələrdən birində - "Wall Street"də yerləşən "Bowling Green" parkında nəhəng bayraq dirəyindən asılıb.

Azərbaycanın BMT yanında Daimi Nümayəndəliyinin təşəbbüsü və dəstəyi, Amerika Azərbaycanlıları Cəmiyyətinin təşkilatçılığı və Nyu-York şəhər meriyasının dəstəyi ilə keçirilən mərasimdə ölkəmizin  BMT yanında daimi nümayəndəsi Yaşar Əliyev, xarici işlər nazirinin müavini Elnur Məmmədov, İtaliyanın Nyu-Yorkdakı konsulunun müavini Rikardo Kursi, Nyu-York şəhər meriyasının rəsmiləri, BMT yanında Daimi Nümayəndəlikdə fəaliyyət göstərən diplomatlar və Azərbaycan diasporunun fəalları iştirak ediblər.

Mərasimdə çıxış edən Amerika-Azərbaycan Cəmiyyətinin sədri Tomris Azəri qonaqlara ölkəmizin tarixinin ən şanlı və parlaq səhəfələrdən biri olan 28 May – Müstəqillik Günü barəsində ətraflı məlumat verib. Bildirib ki, azadlığı və istiqlaliyyəti uğrunda tarix boyu mübarizə aparan Azərbaycan xalqı 28 may 1918-ci ildə Şərqin ilk demokratik, hüquqi, dünyəvi və parlamentli respublikasını yaradıb: "Ulu Öndər Heydər Əliyev yenidən Azərbaycanı bizə geri verdi və onun möhkəm təməllər üzərində qurduğu müstəqillik əbədi və dönməz oldu. Bu il Heydər Əliyevin 100 illik yubleyini ona olan böyük minnətdarlıq hissi ilə qeyd edirik. Heydər Əliyevin şah əsəri olan müstəqil Azərbaycanın taleyi etibarlı əllərdədir".

Mərasimdə çıxış edən xarici işlər nazirinin müavini Elnur Məmmədov diqqətə çatdırıb ki, 28 May -Müstəqillik Günü şanlı tariximizə qızıl hərflərlə həkk olunub və bu gün hər bir Azərbaycan vətəndaşının qürur mənbəyidir: "Şərqdə ilk dəfə azad, demokratik, dünyəvi dəyərlərə söykənən müstəqil Azərbaycan Xalq Cümhuriyyətinin qurulması XX əsrdə xalqımızın həyatında yeni bir tarixi mərhələnin başlanğıcı olub. Ulu öndərin imzası ilə xalqımız 70 il sonra yenidən öz müstəqilliyini bərpa etdi. Belə ki, Azərbaycan Xalq Cumhuriyyətinin siyasi varisi olan çağdaş Azərbaycanın qurucusu Ümummilli Lider Heydər Əliyev tərəfindən tarixin ən çətin dövrlərində yenidən quruldu.

Bu gün, Heydər Əliyevin şah əsəri olan müstəqil Azərbaycanın taleyi etibarlı əllərdədir və qurulan möhkəm təməl, aparılan uğurlu siyasət müstəqilliyimizin sarsılmazlığına tam təminat verir. Azərbaycan Respublikasının Prezidenti İlham Əliyevin rəhbərliyi ilə respublikamızda həyata keçirilən demokratik, dünyəvi, hüquqi dövlət quruculuğu prosesi müstəqilliyimizin bəhrəsidir".

Tədbirdə çıxış edən Nyu-York şəhər meriyasının protokol xidmətinin rəhbəri Rəna Abbasova da, 28 May - Müstəqillik Günü münasibəti ilə dünya azərbaycanlılarrını təbrik edib. O, dünyanın harasında yaşamağından asılı olmayaraq bütün azərbaycanlıların hər zaman birlikdə olmasının vacibliyinə diqqət çəkib.

Üçrəngli bayrağımız dövlət himnimizin sədaları altında Nyu-York səmasına qaldırılıb, Azərbaycanın və ABŞ bayraqları səmada birlikdə dalğalanıb.

Mərasim Nyu-Yorkun yerli mediasında canlı yayımlanıb. Ərazini ziyarət edən turistlər bayrağımızın fonunda şəkil çəkdiriblər.

Qeyd edək ki, Nyu-York şəhərinin ilk rəsmi parkı olan və nəhəng bayraq meydanı kimi tanınan "Bowling Green" bu gündən etibarən 10 gün müddətində Azərbaycan bayrağına ev sahibliyi edəcək.

ABŞ-ın Nyu-York şəhərində Azərbaycan bayrağı ucaldılıb.

Bu barədə “Report”a Azərbaycanın Birləşmiş Millətlər Təşkilatı (BMT) yanında Daimi Nümayəndəliyindən bildirilib.

Mərasim Azərbaycanın xarici işlər nazirinin müavini Elnur Məmmədovun iştirakı ilə keçirilib.

Anar Tağıyev