Azərbaycan Mərkəzi Bankı (AMB) “Maliyyə bazarlarında kibertəhlükəsizlik Strategiyası”nı qəbul etməzdən əvvəl maliyyə bazarında kibertəhlükəsizliyə dair vəziyyəti qiymətləndirib.

"Report" xəbər verir ki, bunu AMB-nin informasiya və kibertəhlükəsizlik şöbəsinin müdiri Elvin Şahverdiyev bildirib.

O qeyd edib ki, sorğular keçirilib və bu zaman əsasən kibertəhlükəsizlik çərçivəsinin tələbləri, həmçinin məxfilik məsələləri əhatə olunub: "İlkin qiymətləndirmə ilə müəyyən olunub ki, kibertəhlükəsizlik göstəricisi bank sektoru üzrə 2,14 %, sığorta sektoru üzrə 1,85 %, ödəniş bazarı üzrə 2,85 % və ümumilikdə maliyyə bazarı üzrə 2,28 % -dir.

AMB olaraq biz bir çox ölkələrin - Türkiyə, Qazaxıstan, Sinqapur, İngiltərə və Fransanın təcrübələri ilə tanış olmuşuq. Bu strategiyanın ərsəyə gətirilməsində həm beynəlxalq ekspertlərin, həm də komandamızın çox böyük əməyi var. O cümlədən Beynəlxalq Valyuta Fondunun kibertəhlükəsizlik sahəsində fəaliyyət göstərən ekspertləri ilə qarşılıqlı sıx əlaqədə olmuşuq".