“Almaniya Ukraynanı bundan sonra da maliyyə resursları, eləcə də silah-sursatla təmin etməyə davam edəcək”.

“Report” “RBK-Ukrayna”ya istinadən xəbər verir ki, bunu Almaniya Kansleri Olaf Şolts NATO Baş katibi Yens Stoltenberqlə birgə mətbuat konfransında deyib.

Onun sözlərinə görə, Qərb Rusiyanın təcavüzünün kifayət qədər uzun müddət davam edəcəyinə hazır olmalıdır və bu səbəbdən də NATO müttəfiqləri buna hazırlaşırlar, siyasətlərini buna uyğunlaşdırırlar.

“Büdcəmizdə kifayət qədər maliyyə vəsaiti var və sənayemiz silah istehsalı, təmiri və onlara texniki xidmətin göstərilməsi üçün imkanlarını artırır”, - O.Şolts vurğulayıb.

Qeyd edək ki, Almaniya demək olar, Rusiyanın Ukraynada müharibəyə başladığı andan rəsmi Kiyevə hərbi yardım göstərir. Almaniya Ukraynaya artıq zirehli texnika və zenit-raket qurğuları verib. Bundan əlavə, Ukrayna Silahlı Qüvvələri ən son “Leopard 2A6” tankları əldə ediblər.

Həmçinin Almaniyanın “Rheinmetall” müdafiə konserni Ukraynada müasir tanklar və piyadaların döyüş maşınları istehsal etməyi planlaşdırdığı zavodu tikmək istəyir.