Ukrayna Silahlı Qüvvələrinin baş komandanı Valeri Zalujnı əks-hücumun “ləng tempini” şərh edərkən amerikalı rəsmilərə Ukrayna qüvvələrinin cəbhəni yarmağa hazır olduğunu açıqlayıb.

“Report” xəbər verir ki, bu barədə “The Wall Street Journal” adı çəkilməyən amerikalı məmura istinadən bildirib.

Nəşrin yazdığına görə, ABŞ və Ukrayna rəsmiləri bir neçə həftədir ki, Kiyevin əks-hücumunun strategiyası və taktikası ilə bağlı gərgin pərdəarxası müzakirələr aparırlar. Amerikalı hərbçilər ukraynalıları Rusiya müdafiəsini yarıb Azov dənizinə çatmağa çalışmaq üçün qüvvələrini cəmləşdirməyə çağırıb.

Adı açıqlanmayan məmurun sözlərinə görə, amerikalılarla söhbətlərinin birində Valeri Zalujnı belə cavab verib: “Siz bu münaqişənin təbiətini başa düşmürsünüz”.

“Bu, üsyançılara qarşı mübarizə deyil. Bu, Kurskdur”, - komandir Almaniya və SSRİ arasında İkinci dünya müharibəsinin əsas döyüşünə toxunaraq əlavə edib.

Nəşrin mənbəsinə görə, ABŞ-nin Ukraynaya verdiyi hərbi texnikanın həcmi (43 milyard dollardan çox silah ayrılıb) bu ​​hücum üçün yetərlidir və çətin ki 2024-cü ildə eyni səviyyədə qalsın.

“Biz bu polad dağını əks-hücum üçün yaratdıq. Bunu təkrarlaya bilmərik”, - keçmiş ABŞ rəsmilərindən biri vurğulayıb.