Braziliya Hərbi Dəniz Qüvvələri şimal-şərqdəki Pernambuko ştatının sahillərində bir qayıqda 3,6 ton kokain ələ keçirdiklərini, bunun sahilində qeydə alınan ən böyük narkotik maddə müsadirəsi olduğunu açıqlayıb.

“Report” “Reuters”ə istinadən xəbər verir ki, dəniz qüvvələri beş ekipaj üzvü ilə birgə sahil boyunca insanların və yüklərin daşınması üçün istifadə edilən kiçik motorlu qayığı ələ keçirdiyini bildirib.

Qayıq patrul gəmisi tərəfindən yedəklə Resifi limanına aparılıb.

Müsadirə Hərbi Dəniz Qüvvələrinin ölkə sahillərində narkotik vasitələrin daşınması ilə mübarizə aparmaq üçün keçirdiyi silsilə əməliyyatlar fonunda həyata keçirilib.

Hərbi Dəniz Qüvvələrinin məlumatına görə, 2020-ci ildən indiyədək 17 tondan çox kokain, 4,3 ton həşiş, 695 ton siqaret, 113,34 ton balıq, 14 ton marixuana və 3 146 kubmetr odun ələ keçirilib.