Bakıda keçiriləcək karate üzrə Premyer Liqa yarışında son anda daha bir Azərbaycan iştirakı rəsmiləşib.

Bunu "Report"a açıqlamasında Azərbaycan Milli Karate Federasiyasının prezidenti Yaşar Bəşirov açıqlayıb.

O bildirib ki, dördqat Avropa mükafatçısı, IV İslam Həmrəyliyi Oyunlarının qalibi və II Avropa Oyunlarının medalçısı olan kataçı Roman Heydərovun da adı yarışın iştirak ərizəsinə salınıb: "Onun adı qeydiyyatdan keçirilməmişdi. Yarış iştirakçılarından birinin gəlməməsi dəqiqləşdiyi üçün onun yerinə adı iştirak ərizəsinə daxil edildi".

Qeyd edək ki, 2-4 sentyabrda Heydər Əliyev adına İdman Kompleksində keçiriləcək yarışda Azərbaycan 17 idmançı (16 kumite və 1 kata) ilə mübarizə aparacaq. Bu yarışda ümumilikdə 58 ölkədən 350-yə yaxın karateçi mübarizə aparacaq. Ən böyük heyətlə İtaliya (23), Yaponiya (21) və Türkiyə (20) təmsil olunacaq.

Bu yarışa ötən il "Grand Winner" titulunu qazanmış 8 karateçi də qatılacaq. Həmin idmançılar bunlardır: Serap Özçelik Arapoğlu, Mərvə Çoban, Məltəm Hocaoğlu Akyol (hər üçü Türkiyə), Anjelika Terlyuqa (Ukrayna), Fəryal Abdelaziz, Əli Əl-Savi (hər ikisi Misir), Zabiollah Purşab (İran), Qoqita Arkania (Gürcüstan).