Qlobal Metan Azaldılması təşəbbüsünun (AGMR) neft-qaz sənayesi iştirakçılarının Azərbaycanda emissiyaların azaldılması sahəsinə növbəti mühüm töhfəsi ola bilər.

"AVESTA.AZ" Azərbaycan Dövlət Neft Şirkətinə (SOCAR) istinadən xəbər verir, bu barədə AGMR çərçivəsində BP və SOCAR-ın birgə təşkilatçılığı ilə Eko-Parkda keçirilən beynəlxalq konfransda bildirilib.

Tədbirdə çıxış edən nümayəndələr tərəfindən planetimiz üçün qlobal təhlükəyə çevrilmiş iqlim dəyişikliyinin yaranmasında metan emissiyalarının rolu, “Paris Sazişi” və onun müddəalarının icrası, neft-qaz əməliyyatlarının bütün dəyər zəncirində metan emissiyalarının monitorinqi, onların azaldılmasında müasir texnologiyaların rolu, dron və peyk əsaslı texnologiyaların tətbiqi, “OGMP 2.0” və onun hesabatlıq tələbləri, Azərbaycanda metan emissiyalarının azaldılması potensialı və bu sahədə texnoloji həllərin tətbiqi, ən yaxşı beynəlxalq təcrübələrə dair nümunələr, “LDAR” layihələrinin icrası, habelə bu sahədə layihələrin maliyyələşdirilməsi imkanlarına dair təqdimatlar edilib.

Çıxışlarda iqlim dəyişikliyinin təkcə ekoloji deyil, həm də davamlı inkişafın iqtisadi və sosial aspektlərinə ciddi təsir göstərdiyi qeyd olunub. Qlobal xarakter daşıyan iqlim dəyişikliyinin qarşısını almaq üçün sənaye liderləri tərəfindən emissiyaların azaldılması həllərinin tətbiqinin, ən yaxşı təcrübələrin öyrənilməsinin, həmçinin paralel olaraq "yaşıl" texnologiyaların tətbiqinin mühüm önəm daşıdığı diqqətə çatdırılıb.

Tədbir iştirakçıları konfransın təşkilinin COP29 ərəfəsində ölkəmizin qlobal iqlim gündəliyinə sadiqliyinin yüksək təcəssümü kimi qiymətləndiriblər.

Konfransda, həmçinin belə təşəbbüslərin operator şirkətlər üçün SOCAR və bp kimi qabaqcıl sənaye liderlərinin təcrübəsinin öyrənilməsi baxımından yüksək əhəmiyyəti xüsusi vurğulanıb, iştirakçıların sualları cavablandırılıb, mövzu ətrafında müzakirələr aparılıb.

Konfransda SOCAR-ın, BP-nin, Azərbaycanda fəaliyyət göstərən digər beynəlxalq neft-qaz şirkətlərinin, operator təşkilatların, BMT-nin Ətraf Mühit Proqramının, Avropa Komissiyasının, “Neft və Qaz İqlim Təşəbbüsü” təşkilatının, Beynəlxalq Enerji Agentliyinin, Beynəlxalq Neft və Qaz Hasilatçıları Assosiasiyasının, Dünya Bankının, Ətraf Mühitin Müdafiəsi Fondunun, Alman Aerokosmik Mərkəzinin, “GHGSat”, “Baker Hughes”, “SLB” kimi şirkətlərin nümayəndələri iştirak ediblər.

Qeyd edək ki, SOCAR və BP şirkətləri birgə Azərbaycanda qabaqcıl sənaye liderləri kimi Metan Rəhbər Prinsipləri (“Methane Guiding Principles” – MGP) çərçivəsində Qlobal Metan Azaldılması (“Advancing Global Methane Reduction” - AGMR) təşəbbüsünü icra edirlər.

Təşəbbüsün əsas məqsədi SOCAR və BP tərəfindən Azərbaycanda fəaliyyət göstərən neft-qaz operatorları üçün metan emissiyalarının ölçülməsi, hesabatlılığı və azaldılması fəaliyyətlərinin təşviq edilməsi, bu sahədə bilik və bacarıqların təkmilləşdirilməsi, habelə mövcud ən qabaqcıl texnologiyaların tətbiqini dəstəkləməkdən ibarətdir.