Bu il xalq artisti, “Şöhrət” ordenli, Dövlət Rəqs Ansamblının yaradıcısı, rəqqasə Xumar Zülfüqarovanın 95 illik yubileyidir. Böyük teatr və kino aktyoru Rza Əfqanlının ailəsində dünyaya göz açan Xumar Zülfüqarova 60 ildən çox bir müddətdə Bakı Xoreoqrafiya Akademiyasında pedaqoji fəaliyyətlə məşğul olmuş, saysız-hesabsız tələbələr yetişdirmişdir.

Sənətkarın sənət yoldaşı, əməkdar artist Aliyə Ramazanova Moderator.az-a bildirib ki, Xumar Zülfüqarova nəinki baletlərə quruluş verib, o tələbələri ilə birgə həmçinin milli rəqsləri də böyük həvəslə hazırlayıb.

“Bu gözəl şəxsiyyət, sənətkar bizim Xoreoqrafiya məktəbimizdə minlərlə tələbələr yetişdirib. Azərbaycanda baletin ən gözəl ustaları onun tələbələridir. Bununla bərabər Xoreoqrafiya məktəbində Azərbaycan milli rəqslərindən də dərs deyib. Xumar xanım milli rəqslərimizi bildiyinə görə 1972-ci ildə Mahnı və Rəqs Ansamblına rəhbər təyin olundu. Xumar xanım təkcə rəqsi qurmurdu, o rəqsdə geyimlərə, bəzək-düzək əşyalarına çox önəm verirdi. Xumar xanım mənim üzərimdə o rəqsləri başa salırdı, tənzimləyirdi. Yadıma gəlir ki, Danimarkada bizim çıxışımız olanda Xumar xanım sevincindən ağlayırdı, sevinc göz yaşları tökürdü” deyə sənət dostu deyib.

 

Xumar Zülfüqarovanın tələbəsi, tanınmış rəqqas Tahir Eynullayev onunla ilk tanışlığını belə xatırlayır.

“Hər zaman demişəm ki, həyatda valideynlərimdən başqa 3 nəfərə borcluyam. O mənim müəllimlərim Xumar Zülfüqarova, Leyla Vəkilova və Əminə Dilbazidir. Xumar xanımdan demək olar ki, dərs metodikasını, həyata başqa cür baxmağı öyrənmişəm. Xumar xanımla mən uşaqlıqdan tanışam, çünki incəsənət ailəsində böyümüşəm. Bəxtim onda gətirdi ki, Xoreoqrafiya Akademiyasında təhsilimi məhz Xumar xanımın sinfində başladım və onunla da bitirdim. Hamı məni dünya xalq rəqslərinin ifaçısı kimi tanıyır. Bunu da mənə Xumar xanım aşılayıb və o istedadı məndə Xumar xanım tapıb. Mənim üçün Xumar xanım böyük bir insandır. O bizə rəqsi yaşamağı öyrədib. Hər dərsdən sonra deyirdi ki, öpürəm sizi! Çox tələbkar müəllim idi. Dərsin nə qədər ağır və çətin keçməsindən asılı olmayaraq bu sözdən sonra yenidən onun bizə dərs keçməsini istəyirdik” deyə tanınmış rəqqas bildirib.

 

Xalq artistinin nəvəsi Eldar Zülfüqarov da onunla bağlı xatirələrini Moderator.az saytı ilə bölüşüb.

 

“Nəvə kimi yox, bir vətəndaş kimi deyə bilərəm ki, Xumar xanım öz sənətinin əvəzolunmaz xadimi olub. Biz 4 qardaşıq. Böyük qardaşım Anar nənəmin yolunun davamçısı idi, Xoreoqrafiya məktəbində oxuyurdu. Lakin sona qədər getmədi, digər bir peşəyə sahibləndi. Buna baxmayaraq nənəm heç vaxt razı deyildi ki, biz rəqslə məşğul olaq. Son illərində onun üçün 90 illik yubiley planlaşdırılırdı, çox əfsuslar olsun ki, nənəm o günü görmədi. İş yoldaşları zəng edib ona yubiley haqda nəsə deyəndə o qədər sevinirdi ki. Bu yaşda hər səhər durub idman edirdi. O son illərinə qədər gümrah, ağlı başında, sağlam yaşadı. Nənəm qardaşımın toyunda da oynayıb, mənim toyumda da. Amma nənəmin mənim toyumdakı rəqsi bizə böyük sürpriz oldu. Hər kəs kənarda dayanıb, ayaqüstə onu alqışlayırdı. Sanki öz hərəkətləri ilə musiqini insanlara başa salırdı” deyə sənətkarın nəvəsi bildirib.