"Azerconnect Group"un Baş direktoru Emil Məsimov COP29 çərçivəsində keçirilən Biznes Forumda dayanıqlı innovasiya mövzusunda panel müzakirəsində iştirak edib. O, iqlim dəyişikliyi fonunda yeni texnologiyalar yolu ilə dayanıqlı gələcəyin qurulması mövzusunda çıxış edərək "Azerconnect Group"un enerjiyə qənaət, bərpa olunan enerji mənbələrindən istifadə, zərərli tullantıların təkrar emalı və "yaşıl" biznes modeli istiqamətlərində şirkətlər qrupunun uğurlu təcrübəsini və əldə etdiyi nəticələri paylaşıb.

Belə ki, "Azerconnect Group" mobil rabitə şəbəkəsini optimallaşdıraraq enerji istehlakına təxminən 60 % qənaət edir, bu da illik 53 min meqavatlıq yüksək göstərici deməkdir. Bundan başqa, pilot layihə olaraq, "Azerconnect" şirkətlər qrupunun günəş enerjisi ilə çalışan baza stansiyası da öz dayanıqlılığını isbat edib. Elektron cihazların təkrar istifadəsini stimullaşdırmaq üçün isə Türkiyənin "EasyCep" şirkəti ilə faydalı əməkdaşlıq qurulub.

"Azerconnect Group" BMT-nin dayanıqlı inkişaf hədəflərinə və qrupun gələcəyə yönəlik inkişaf strategiyasına uyğun olaraq bərpa olunan enerjidən istifadəni genişləndirməyi, "yaşıl" texnologiya innovasiyalarına sərmayə yatırmağı və elektron tullantıların azaldılması üçün təkrar emal səylərini artırmağı hədəfləyir.

"Azerconnect Group" dinamik şəkildə inkişaf edən İKT və yüksək texnologiyalar sahələrində beynəlxalq standartlara uyğun müxtəlif xidmətlər təqdim edən şirkətlər qrupudur və "NEQSOL Holding"in tərkibinə daxildir.