Bu gün Avropa çempionatında qrup mərhələsinin I turu çərçivəsində üz-üzə gələcək İspaniya və Xorvatiya komandaları daha əvvəl böyük turnirlərdə (dünya və Avropa çempionatları) üç dəfə qarşılaşıblar.

"AVESTA.AZ" xəbər verir ki, bu görüşlərin ikisində ispanlar, birində isə xorvatlar qələbə qazanıb.

Belə ki, ilk dəfə rəsmi olaraq AVRO-2012-də qarşılaşan tərəflərin duelində İspaniya millisi 1:0 hesabı ilə qalib gəlib. 4 il sonra AVRO-2016-da yenidən yolları kəsişən komandaların mübarizəsində xorvatlar 2:1 hesablı qələbəyə seviniblər. AVRO-2020-nin 1/8 finalında da qarşılaşan yığmaların son rəsmi görüşündə İspaniya millisi 5:3 hesabı ilə qələbə qazanıb.

Günün digər maraqlı oyununda qarşılaşacaq İtaliya və Albaniya yığmaları isə bu günədək iki rəsmi matçda - 2018-ci il dünya çempionatının seçmə mərhələsinin görüşləri çərçivəsində üz-üzə gəliblər. Hər iki qarşılaşmada qalib gələn (2:0, 1:0) italiyanlar sürprizə imkan verməyiblər.

Bu gün münasibətlərinə aydınlıq gətirəcək Macarıstan və İsveçrə yığmaları isə daha əvvəl 9 rəsmi matçda qüvvəsini sınayıb. Bu oyunların dördündə İsveçrə, ikisində isə Macarıstan yığması qələbəni bayram edib. Üç görüşdə isə heç-heçə qeydə alınıb.

Qeyd edək ki, Macarıstan - İsveçrə matçı saat 17:00-da, İspaniya - Xorvatiya 20:00-da və İtaliya - Albaniya görüşü isə 23:00-da start götürəcək.