Azərbaycan NATO ilə müntəzəm siyasi dialoq aparır və regionda və onun hüdudlarından kənarda sülh və təhlükəsizliyə töhfə vermək üçün alyansla geniş spektrli məsələlərlə bağlı siyasi əməkdaşlığı inkişaf etdirir.

“AVESTA.AZ” xəbər verir ki, bunu Xarici İşlər Nazirliyinin Hərbi-siyasi məsələlər idarəsinin rəis müavini-şöbə müdiri Anar Mütəllimov enerji təhlükəsizliyi və iqlim dəyişikliyi məsələlərinin öyrənilməsinə həsr olunmuş “Azərbaycan-NATO” tədbirində deyib.

"Biz dövlətlərin siyasi müstəqilliyinə, suverenliyinə və ərazi bütövlüyünə hörmət etməyə sadiqik. Keçmişə nəzər salsaq, deyə bilərik ki, Azərbaycan öz məqsədlərinə çatmaqda böyük irəliləyiş əldə edib, onun tərəfdaşlığı isə NATO ilə münasibətlərinin çoxşaxəli hissəsinə çevrilib. Azərbaycan alyansla müntəzəm siyasi dialoq aparır və regionda və onun hüdudlarından kənarda sülh və təhlükəsizliyə töhfə vermək üçün geniş spektrli məsələlərlə bağlı NATO ilə siyasi əməkdaşlığı inkişaf etdirir”, - A.Mütəllimov bildirib.
XİN nümayəndəsi əlavə edib ki, Azərbaycan etibarlı tərəfdaş kimi NATO-nun əməliyyatlarına töhfə verir və ölkənin Avro-Atlantik regionda sülh və təhlükəsizliyin möhkəmləndirilməsinə sadiqliyini bir daha təsdiqləyib.

“Azərbaycan-NATO tərəfdaşlığı hərbi əməkdaşlıqdan kənara çıxır və təhlükəsizlik sektorunda islahatlar, elm və ətraf mühit, humanitar minalardan təmizləmə, qadınlar, sülh və təhlükəsizlik, enerji təhlükəsizliyi və s. məsələləri əhatə edir”, - o qeyd edib.

XİN rəsmisi Azərbaycan ilə NATO arasında əməkdaşlığın daha da inkişaf etdirilməsi üçün potensialın olduğunu vurğulayıb.

“Müxtəlif xarakterli yeni və ortaya çıxan çağırışlar əməkdaşlıq ruhu və tərəfdaşlığın daha da inkişaf etdirilməsini tələb edir. Azərbaycan uzun müddətdir Şərqlə Qərb arasında enerji körpüsüdür və Avropanın enerji təhlükəsizliyinin təmin olunmasına kömək edir. Enerji infrastrukturunun mövcudluğu və qaz potensialının artması sayəsində Azərbaycan xüsusilə indiki beynəlxalq şəraitdə Avro-Atlantik regionun enerji təhlükəsizliyinin təmin edilməsində mühüm rol oynayır”, – o bildirib.

A.Mütəllimov onu da xatırladıb ki, Azərbaycan Qarabağda və ölkənin digər regionlarında bərpa olunan enerji mənbələrini fəal şəkildə inkişaf etdirir.

"Biz mühüm enerji təminatçısı kimi rolumuzu iqlim öhdəliklərimizlə balanslaşdırmağın mümkün olduğunu nümayiş etdiririk. Bura regionumuzda gələcək enerji əlaqəsinin tərkib hissəsi olacaq “yaşıl enerji” zonaları və dəhlizlərinin yaradılması üzrə iş daxildir", - XİN nümayəndəsi qeyd edib.