Beynəlxalq Münasibətlərin Təhlili Mərkəzi (BMTM) 2021-ci ili 10 min manat xalis mənfəətlə başa vurub.

“Report” bu barədə qurumun maliyyə hesabatına istinadən xəbər verir.

Ötən il BMTM-nin vergiyəqədərəki mənfəəti 13 min manat, mənfəət vergisi ödəmələri isə 3 min manat təşkil edib.

Bu il yanvarın 1-nə qurumun aktivləri 5,105 milyon manat, o cümlədən öhdəlikləri 224 min manat, balans kapitalı isə 4,881 milyon manat təşkil edib.

BMTM ölkə prezidentinin 6 fevral 2019-cu il tarixli fərmanı ilə yaradılıb, publik hüquqi şəxsdir. Onun nizamnamə kapitalı 4,871 milyon manatdır. Mərkəzin əsas məqsədi Azərbaycanda və dünyada baş vermiş vacib beynəlxalq prosesləri təhlil etmək, beynəlxalq məsələlərə dair yüksək keyfiyyətdə araşdırma materialları və hesabatlar hazırlamaq, Azərbaycanla bağlı araşdırmaları genişləndirmək, Cənubi Qafqaz regionunda gedən proseslər və təhlükəsizliklə əlaqədar məsələləri tədqiq etmək, həmçinin müvafiq olaraq ölkənin mövqeyinin beynəlxalq ictimai, siyasi və akademik dairələrə çatdırılmasında iştirak etməkdir.