“Azərbaycan Sənaye Korporasiyası” ASC (ASK) 2021-ci 44,099 milyon manat xalis mənfəətlə başa vurub. Halbuki, ASK 2020-ci ildən 3,488 milyon manat xalis zərərlə çıxmışdı.

“AVESTA.AZ” xəbər verir ki, ötən il ASK-nın satışdan gəlirləri 429,156 milyon manat (illik müqayisədə 54,4 % çox), satışının maya dəyəri 330,934 milyon manat (29,3% çox), ümumi və inzibati xərcləri 16,981 milyon manat (9,7% çox), satış və paylanma xərcləri 17,06 milyon manat (2,5 dəfə çox), köhnəlmiş mal-material ehtiyyatları üzrə təminat xərcləri 133 min manat (58,3% çox), debitor borcları və digər alınacaq vəsaitlər üzrə ehtimal olunan kredit zərəri 3,201 milyon manat (20,8 dəfə çox), maliyyə xərcləri 2,3 milyon manat (22,1% az), digər xərcləri 620 min manat (əvvəlki il gəlir olub), mənfəət vetrgisi ödəmələri isə 13,828 milyon manat (12,4 dəfə çox) təşkil edib.

Bu il yanvarın 1-nə ASK-nın aktivləri 1 507,128 milyon manat olub ki, bu da illik müqayisədə 3,1 % çoxdur. Hesabat dövründə korporasiyanın öhdəlikləri 12,3% azlaaraq 89,454 milyon manata düşüb, balans kapitalı 4,3 % artaraq 1 417,674 milyon manata çatıb.

Xatırladaq ki, ASK 2017-ci ildə dövlət əmlakının idarə edilməsinin səmərəliliyini artırmaq, korporativ idarəetmə prinsiplərinə əsaslanan hesabatlılıq və nəzarət sistemini formalaşdırmaq, dövlətə məxsus müəssisələr arasında əlverişli kooperasiya əlaqələrinin yaradılmasına və istehsal potensialının dəyər zəncirinin həlqələri üzrə artırılmasına nail olmaq məqsədilə yaradılıb. Onun nizamnamə kapitalı 500 milyon manatdır.