ABŞ-nin yeni seçilmiş Prezidenti Donald Tramp yanvarın 20-də vəzifəsinin icrasına başladıqdan sonra 100 gün ərzində Çinə səfər etməyi planlaşdırır.

“AVESTA.AZ” xəbər verir ki, bu barədə “The Wall Street Journal” mənbələrə istinadən məlumat yayıb.

Onun məlumatına görə, Tramp müşavirlərinə Çin Sədri Si Cinpinlə əlaqələri gücləndirmək üçün bu ölkəyə getmək arzusunu bildirib. Nəşr qeyd edib ki, səfərlə bağlı yekun qərar qəbul olunmayıb, lakin Amerikanın yeni seçilmiş lideri bu səfəri vəzifəyə başladıqdan sonra ilk 100 gün ərzində həyata keçirmək arzusunda olduğunu deyib.

Tramp Çinə sonuncu dəfə 2017-ci ildə səfər edib. Nəşr qeyd edib ki, Tramp və Si Cinpin köməkçiləri vasitəsilə şəxsi görüş imkanını müzakirə ediblər, respublikaçı Çin Sədrini ABŞ-yə dəvət edib.

ABŞ-nin yeni seçilmiş lideri cümə günü Si Cinpin ilə telefon danışığı aparıb və bildirib ki, Vaşinqton və Pekin yaxın gələcəkdə bir çox problemləri birlikdə həll edəcək.

Çinin Sədrinin müavini Han Çjen Si Cinpinin xüsusi nümayəndəsi kimi yanvarın 20-də ABŞ-nin yeni seçilmiş Prezidenti Donald Trampın andiçmə mərasimində iştirak edəcək.

ABŞ-nin seçilmiş lideri Çinə səfərindən əlavə, müşavirləri ilə sonuncu dəfə 2020-ci ildə səfər etdiyi Hindistana səfərin mümkünlüyü barədə danışıb.