Süni intellekt (Sİ) sahəsində aparıcı 24 mütəxəssis hesabat dərc edərək, müasir yanaşmanın, xüsusilə də universal süni intellektə (AGI) doğru irəliləyişin yanlış istiqamətdə olduğunu bildiriblər.

BAKU.WS ferra.ru-ya istinadən xəbər verir ki, sənəd AAAI 2025 prezident panelində təqdim edilib və 475 ekspertin rəyinə əsaslanır.

Sorğuda iştirak edənlərin 76%-i mövcud metodların genişləndirilməsinin AGI-nin yaranmasına gətirib çıxarmayacağına əmindir. Bundan əlavə, 90% hesab edir ki, cəmiyyətin Sİ-yə baxışı reallıqla üst-üstə düşmür və bu, sahənin inkişafına mane olur.

MIT-dən professor Rodni Bruksun sözlərinə görə, süni intellekt ətrafındakı ajiotaj ehtiyatla qarşılanmalıdır, çünki bu, yalnız Gartner-in müəyyən etdiyi "həddindən artıq gözləntilər dövrü"nün bir hissəsidir.

Hesabat müəllifləri Sİ-nin təhlükəsiz, etik və mərhələli inkişafına üstünlük verilməli olduğunu vurğulayır. Onların fikrincə, gələcəkdə süni intellektin etibarlılığını artırmaq üçün bir-birini yoxlayan agentlər arasında əməkdaşlıq əsas rol oynayacaq.

Qeyd edək ki, bütün tənqidlərə baxmayaraq, Sİ sahəsində inkişaf sürətlə davam edir. Mütəxəssislər hesab edirlər ki, hazırkı dövr süni intellektdən imtina deyil, ona yeni yanaşma formalaşdırmaq üçün əlverişlidir.