ABŞ-ın keçmiş prezidenti Donald Tramp 2 aprel tarixini ölkənin iqtisadi suverenliyi günü elan edərək yeni gömrük tarifləri tətbiq edəcəyini açıqlayıb. Ağ Evdə təşkil olunan tədbirdə Tramp ABŞ-nin son yarım əsrdə iqtisadi baxımdan ədalətsiz rəqabətə məruz qaldığını vurğulayıb və bu vəziyyəti dəyişmək üçün qətiyyətli addımlar atacağını bildirib.

BAKU.WS xəbər verir ki, yeni tariflərə əsasən, Çin mallarına 34%, Avropa İttifaqına 20%, Yaponiyaya 24%, Hindistana isə 26% rüsum tətbiq ediləcək. Daha az inkişaf etmiş ölkələrdən olan Vyetnam və Myanmadan idxal edilən məhsullara isə 50%-ə qədər tarif müəyyən olunacaq.

Bundan əlavə, ABŞ-a məhsul göndərən bütün ölkələrdən minimum 10%-lik gömrük rüsumu alınacaq. Trampın sözlərinə görə, bu qərar Amerika sənayesini qorumaq və ticarət balansını daha stabil hala gətirmək məqsədi daşıyır. Siyahıda Azərbaycanda da var. ABŞ ölkəmizə 10% gömrük rüsumu tətbiq edib.

Bəs bu qərar Azərbaycana idxal olunan inşaat materialları, ərzaq məhsulları, qeyri-ərzaq məhsulları, elektrotexnika, avtomobil və ehtiyat hissələrinə necə təsri edəcək?

Mövzu ilə bağlı BAKU.WS-ə danışan iqtisadçı Rəşad Həsənov bildirib ki, ABŞ-dən birbaşa idxal olunan məhsullara bu qərarın heç bir təsiri yoxdur. Çünki bu, idxalla bağlı ABŞ administrasiyası tərəfindən qəbul edilən qərardır: 

"Azərbaycan məhsullarının ABŞ-yə ixrac olunması zamanı həmin məhsullara tətbiq edilən rüsumların səviyyəsini əks etdirir. Yəni Azərbaycan məhsullarının ABŞ-yə ixracında həmin bazarda satışı həmin rüsumların təsiri ilə üzləşə və burada qiymət artıcı effekt göstərə bilər. 

Lakin ABŞ-dən ölkəmizə idxal olunan məhsullara münasibətdə təsir olmayacaq. Burada digər məqam Azərbaycanda idxala təsir aspektlərdir. Fikrimcə, bu qərar dünyada inflyasiyanı tətikləyəcək və qiymətlər artacaq. Bunu nəticəsində Azərbaycan da təsirlənəcək. Ölkəmizə idxal olunan bütün növ məhsulların qiymətində növbəti dövr üçün qiymət artımı təzyiqləri güclənəcək. Azərbaycanda mövcud inflyasiyada idxalın mövqeyi daha da artacaq".

Orxan Hüseyn