Çində ilk dəfə tamamilə avtonom işləyən humanoid (insanabənzər) robotlar arasında futbol turniri təşkil olunub. "Robo League" adlı bu yarışda insanlar oyuna müdaxilə etməyib. Robotlar özləri qərar verib, hərəkət edib və topu, eləcə də rəqib oyunçuları kameralar və sensorlar vasitəsilə tanıyıblar.

BAKU.WS ferra.ru-ya istinadən xəbər verir ki, finalda Tsinxua Universitetinin "THU Robotics" komandası Çin Kənd Təsərrüfatı Universitetinin "Mountain Sea" komandasını 5:3 hesabı ilə məğlub edib.

Turnirin əsas özəlliyi hər şeyin robotlar tərəfindən idarə olunması olub. Matçlar 10 dəqiqəlik iki hissədən ibarət idi və hər komandada 3 oyunçu robot və 1 ehtiyat robot iştirak edirdi.

Təşkilatçılar bildirirlər ki, bu yarış 2025-ci ilin avqustunda Pekində keçiriləcək Humanoid Robot Oyunlarına hazırlıq xarakteri daşıyır. Həmin beynəlxalq yarışlarda robotlar atletika, gimnastika və sinxron rəqs də daxil olmaqla 11 fərqli növdə yarışacaqlar.

Oyunların səviyyəsi hələ ki, beş yaşlı uşaqların futboluna bənzədilir, lakin mühəndislər əmindir ki, texnologiya inkişaf etdikcə robotların bacarıqları da artacaq. Bu cür yarışlar həm də robotların gündəlik həyata uyğunlaşdırılması məqsədini daşıyır.