Son illərdə artan gigiyena vərdişləri, xüsusilə antibakterial sabunlar və dezinfeksiya vasitələrinin geniş istifadəsi fonunda mütəxəssislər "həddindən artıq təmizlik" sindromu barədə xəbərdarlıq edirlər. Elmi araşdırmalar göstərir ki, gigiyenanın ifrat dərəcədə olması bəzi hallarda immun sisteminin zəifləməsinə səbəb ola bilər.

BAKU.WS xəbər verir ki, həkim və immunoloqlar bu məsələni "gigiyena hipotezi" ilə izah edir. 1989-cu ildə britaniyalı epidemioloq Devid Straçan tərəfindən irəli sürülən bu hipotezə görə, uşaqların mikroorqanizmlərlə yetərincə təmasda olmaması onların immun sistemini "təlimsiz" qoyur. Bu da gələcəkdə allergiya, asma və avtoimmün xəstəliklərə meyilliliyi artırır.

Ümumdünya Səhiyyə Təşkilatının məlumatına görə, müasir steril mühitlərdə böyüyən uşaqlar daha çox allergik xəstəliklərə tutulur. Uşağın orqanizmi erkən yaşlardan müəyyən mikroblarla təmasda olmadıqda, immun sistemi daha sonra zərərsiz maddələrə qarşı da həssaslıq göstərə bilər.

ABŞ Xəstəliklərə Nəzarət və Profilaktika Mərkəzi (CDC) bildirir ki, mütəmadi, lakin normadan artıq dezinfeksiya vasitələrinin istifadəsi dəriyə zərər verə, faydalı bakteriyaları öldürə və nəticədə immuniteti zəiflədə bilər. Mərkəz yalnız əllərin su və sabunla yuyulmasının kifayət etdiyini, spirtli məhlulların isə yalnız zəruri hallarda istifadəsini tövsiyə edir.

İnfeksionist və allergoloqlar bildirir ki, qoruyucu gigiyena vərdişləri (xüsusilə pandemiya dövründə) vacibdir, lakin bu, steril həyat tərzi ilə səhv salınmamalıdır.

Ekspertlər bildirirlər ki, təmizlik vacibdir, lakin ifrat təmizlik orqanizmi lazımi mikroorqanizmlərdən məhrum edir. Bu isə immun sistemin zəifləməsinə, allergiya və digər xəstəliklərə səbəb ola bilər. Həkimlərin tövsiyəsi: gigiyena qaydalarına əməl etməklə yanaşı, təbiətlə balanslı təmas da saxlanılmalıdır.