Siyasi Menecment İnstitutunun direktoru, politoloq Azər Qasımlının cinayət işi üzrə növbəti məhkəmə prosesi keçirilib.

AVESTA.AZ Oxu.Az-a istinadən xəbər verir ki, Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən prosesdə cinayət işində adı zərərçəkən kimi keçən Qurbanəli Yusifovun sərbəst ifadəsi dinlənilib.

Zərərçəkən təqsirləndirilən Azər Qasımlını ReAl Partiyasından tanıdığını deyərək, hətta onun evində də olduğunu deyib:

"Kriptovalyuta sahəsindən mənim anlayışım olduğu üçün Azər Qasımlı bu işə yatırım etmək istədi və 20 min manat yatırım etdi. Birlikdə qazanc əldə edəcəyimizi düşünürdük. Müharibə ərəfəsində ölkə ərazisində internet şəbəkəsində məhdudiyyət olduğundan VPN-in tətbiqi zamanı müəyyən ləngimələr oldu. Bu vaxt kriptovalyuta dəyərdən düşdü, Azərin isə mənimlə münasibəti pozuldu. Bundan sonra itirilən məbləğin müqabilində məndən "Bitcoin" tələb etdi. Mən bunun mümkünsüzlüyünü ona bildirdim, o məni hədələyərək 45 min dollar borclu olmağım barədə aramızda sənəd imzalatdırdı. Sonra qorxumdan ölkəni tərk etdim. Mənə hədə-qorxu gələrək uşağımı qaçıracağını bildirirdi".

Növbəti proses sentyabrın 10-na təyin olunub.

Qeyd edək ki, Siyasi Menecment İnstitutunun direktoru, politoloq Azər Qasımlı barəsində olan müraciətlə əlaqədar 8 dekabr 2024-cü ildə polis tərəfindən saxlanılıb. O, Cinayət Məcəlləsinin 182.2.3 (hədə-qorxu ilə tələb etmə, zor tətbiq etmə ilə törədildikdə) maddəsi üzrə təqsirli bilinir.