Bakıdakı 291 saylı körpələr evi- uşaq bağçasında üç yaşlı körpə yıxılaraq ağır xəsarət alıb.

BAKU.WS Xəzər TV-yə istininadən xəbər verir ki, uşağın atası Elcan İdrisbəyli iddiasına əsasən yıxılaraq sifəti çapılan körpəyə nə ilkin tibbi yardım göstərən, nə də təcili yardım çağıran olub.

"Hadisə baş verəndən sonra onu anasına elə üzüqanlı halda təhvil veriblər. Gəldim ki, bağçanın qabağında anası ilə uşaq çöldə qalıb, uşaqdan da qan gedir - hər yeri qandı. Apardıq "Semaşko"ya. Elə yolda direktor bizi yığdı, heç uşağı soruşmadan dedi ki, bağçanın adını çəkmə", - deyə Elcan İdrisbəyli bildirib.

Valideynlərinin təcili xəstəxanaya çatdırdığı uşağın sifətinə iki tikiş qoyulub, gözünə yaxın hissəyə isə tikiş atmaq mümkün olmayıb, həkimlər bunun təhlükəli olduğunu bildiriblər.

"Gəldik direktora deməyə ki, bizə kamera görüntüsünü təqdim edin. Direktor bildirdi ki, dövlət bağçanı kamera ilə təmin etməyib", - deyə Elcan İdrisbəyli əlavə edib.

Bağçanın direktor Sahibə xanım isə hadisədən vaxtında xəbərdar edilmədiyini, bütün məsuliyyətin müəllimədə olduğunu bildirdi: "Müəllimə mənə vaxtında xəbər verməyib. İzahatını da almışam.

Anası Elnarə xanım dedi ki, "uşaq elə dünən də evdə yıxılıb, olacağa çarə yoxdur, Sahibə xanım". Bir də ki, müəlliməsinin günahıdır. Kaş, müəllimənin uşağına olaydı, müəllimə öləydi, uşağı yetim qalaydı, iki gözü kor olaydı...".

Bakı Şəhəri üzrə Təhsil İdarəsindən isə məsələ ilə bağlı tamamilə başqa açıqlama verildi. Bildirildi ki, 30 sentyabr saat 11:00 radələrində 291 saylı körpələr evi-uşaq bağçasının orta yaş qrupunda uşaqlardan biri yıxılıb və xəsarət alıb. Dərhal bağçanın tibb bacısı tərəfindən ilkin tibbi yardım göstərilib və uşağın valideyninə xəbər verilib. Uşaq valideyni ilə səhiyyə müəssisəsinə aparılıb. Bağçanın tərbiyəçi-müəllimi ilə bağlı tənbeh tədbiri görülüb. Valideynlə əlaqə saxlanılıb, uşağın vəziyyəti qənaətbəxşdir.