Bir müddət öncə Cəlilabadın Ləkin kənd orta məktəbində əlbəyaxa olan müəllimlər Telman Mirzəyev və Əfsun Məcidov arasında baş vermiş davanın təfərrüatı məlum olub.

AVESTA.AZ teleqraf-a istinadən xəbər verir ki, ibtidai sinif müəllimi Əfsun Məcidov hər şeyin onun məktəbdə olan qanunsuzluqları aidiyyəti qurumlara açıqlayacağını dedikdən sonra başladığını bildirib:

"Heç bir işçi yerində deyil, dərslər satılır. Pulla satılır. Kimin ictimai statusu güclüdür, kim kimlə sinif yoldaşı olub əvvəl, kim kimlə qohumdur, kim kimlə münasibəti var, bu və ya digər şəkildə dərslər onlara bölünür. Sertifikasiya balına baxan yox, dərslər hardasa 40-50 manata arasında satılır. Müəllimin saat puludur da - bir saatı neçə manat hesablanır, ondan satılır. Bütün bunlar mənim başıma ona görə gəlir ki, mən aylıq faiz vermirəm. Mənim ailəm böyükdür. Deyirlər, təhsil sektorunda o pulu istəyirlər bizdən. Mən də vermirəm. Çünki verməyə pulum yoxdur. Həm də ki, axşama kimi mənim dərsim var, deyirəm gəlirəm evə. Niyə kiməsə pul verməliyəm" - deyə Əfsun Məcidov bildirib.

Onun sözlərinə görə, hazırda Ləkin kənd orta məktəbində çağırışaqədərki ibtidai hazırlıq müəllimi olan Telman Mirzəyevin də bu işlərdə əli olduğu üçün onunla mövcud konflikt yaşanıb.

Məsələnin ən təhlükəli tərəfi isə Əfsun Məcidov davadan sonra evə getdikdə yaşanıb. Onun sözlərinə görə, Telman Mirzəyevin ailə üzvləri və yaxın qohumlarından ibarət 5 nəfər onun evinə hücum edərək onu və ailəsini hədələyiblər:

"Gördüm belə bir səs-küy gəlir. Gördüm yoldaşı Arifə Quliyeva, oğlu Rövşən Mirzəyev, Arifə Quliyevanın bacısı Tünzalə Quliyeva, oğlu Sudef Quliyev. Sonuncular bunu qaytarmağa çalışırdılar. Oğlan əlində bıçağı belə fırladırdı, gəldi. Qapımızın qabağında itimiz var, it qoymadı onu həyətə girməyə. Ağır-ağır təhqirlər. Yoldaşımı, balalarımı ağır sözlərlə təhqir edirdilər."

Qeyd edək ki, Əfsun Məcidovu döydüyü iddia edilən Telman Mirzəyevin həyat yoldaşı Arifə Quliyeva da məktəbdə katibə vəzifəsində çalışır. İddialara görə, onun da işini əslində həyat yoldaşı Telman Mirzəyev aparır məktəbdə.

Məsələ ilə bağlı Əfsun Məcidovun müraciəti əsasında Cəlilabad Rayon Prokurorluğunda araşdırmalar aparılır.