Ölkə ərazisində çoxmənzilli yaşayış binalarının idarə olunması sahəsində yeni mərhələ başlayıb.

BAKU.WS-in məlumatına görə, mənzil istismar sahələrinin ("JEK"lər) funksiyaları mərhələli şəkildə mənzil mülkiyyətçilərinin müştərək cəmiyyətlərinə ötürülür.

Mənzil Məcəlləsinə əsasən, bu model sakinlərin öz ümumi əmlaklarını kollektiv şəkildə idarə etməsini nəzərdə tutur. Lakin keçid dövrü bir sıra sualları da yenidən gündəmə gətirib. İdarə heyəti ilə sakinlər arasında bağlanan müqavilələrin məzmunu, xərclərin şəffaflığı, toplanan vəsaitin hara xərclənməsi və hesabatlılıq məsələləri fərqli yanaşmalara səbəb olur.

Qeyd edək ki, mənzil mülkiyyətçilərinin müştərək cəmiyyətinin yaradılması sakinlərin iradəsinə əsaslanır. Hər hansı bir cəmiyyətlə müqavilə bağlamaq könüllüdür və heç kim buna məcbur edilə bilməz.

Lakin müqavilənin olmaması sakini kommunal və saxlanma xərclərini ödəməkdən azad etmir. Mülki qanunvericiliyə əsasən, binanın saxlanılması üçün ümumi yığıncağın müəyyən etdiyi tariflər bütün mülkiyyətçilər üçün məcburidir. Burada "azlıq çoxluğa tabedir" prinsipi tətbiq olunur.

Mənzil haqları birbaşa bina sakinlərinin ümumi yığıncağında müəyyən edilir və təsdiqlənir. Eyni zamanda, müəyyən istisnalar mümkündür. Məsələn, aztəminatlı ailələr, pensiyaçılar, tək yaşayan şəxslər və ya əlilliyi olan sakinlər üçün güzəştlər tətbiq oluna bilər. Bununla belə, ümumi qayda olaraq tariflər bütün mülkiyyətçilər üçün eyni əsaslarla müəyyən edilir.

İdarəedici qurumla bağlanan müqavilə standart formalı olmamalı, konkret binanın xüsusiyyətlərinə uyğun tərtib edilməlidir. Sakinlər müqaviləyə xüsusi şərtlər əlavə edə, bəzi xidmətlərdən imtina və ya əlavə xidmətlərin göstərilməsini tələb edə bilərlər.

Şəffaflığın təmin olunması üçün idarəetmə qurumu ən azı rübdə bir dəfə sakinlərə maliyyə hesabatı təqdim etməlidir. Toplanan vəsait, görülən işlər və bağlanmış müqavilələr barədə məlumat açıq şəkildə açıqlanmalıdır. Əgər tərəflər arasında razılıq əldə olunmazsa və ya mülkiyyətçi hüquqlarının pozulduğunu hesab edərsə, o, məhkəməyə müraciət etmək hüququna malikdir.