"UN-Habitat bütün siyasətlərdə, proqramlarda və idarəetmə proseslərində qadınların səlahiyyətlərinin artırılması və gender bərabərliyinin təşviqinə dəstək verən müstəqil məsləhət orqanıdır. Bu gün İcma Assambleyası həm aktual, həm də ictimai siyasət baxımından olduqca vacib bir mövzuya həsr olunub: qadınlar və mənzil məsələsi. Qadınlar üçün mənzil təhlükəsizlik, ləyaqət, iqtisadi müstəqillik, sağlamlıq və sosial həyata tam şəkildə qoşulmaq imkanı deməkdir".

AVESTA.AZ xəbər verir ki, bu sözləri Qadınlar Assambleyasının bütün qadınlar və qızlar üçün adekvat mənzil təminatı üzrə gender transformativ strategiyaların birgə hazırlanmasına həsr olunmuş mərasimdə çıxış edən elm, texnologiya və innovasiyada gender üzrə UNESCO kafedrasının rəhbəri, eyni zamanda Madrid Politexnik Universitetinin şəhərsalma professoru İnes Maderiaga deyib.

Onun sözlərinə görə, təhlükəsiz mənzillər olmasa qadınlar yoxsulluq, zorakılıq, məcburi köçkünlük və təcrid risklərinə daha çox məruz qalırlar:

"Təhlükəsiz və adekvat mənzillər olmadan qadınlar yoxsulluq, zorakılıq, məcburi köçkünlük və təcrid risklərinə daha çox məruz qalırlar. Buna görə də mənzil təkcə fiziki bir sığınacaq deyil.

Dünyanın hər yerində, xüsusilə qeyri-rəsmi yaşayış məntəqələrində, münaqişə bölgələrində və iqlim dəyişikliklərinə həssas icmalarda yaşayan qadınlar mənzil, mülkiyyət hüquqları, torpaq sahibliyi, əlverişli mənzil, infrastruktur və maliyyə imkanlarına çıxış baxımından ciddi bərabərsizliklərlə üzləşməyə davam edirlər. Bununla belə, qadınlar həm də dayanıqlılığın və bərpanın əsas aparıcı qüvvələridir. Onlar evləri yenidən qurur, icmaları qoruyur, məhəllələri və şəbəkələri təşkil edir və daha dayanıqlı şəhərlər üçün yerli həllərin formalaşmasına rəhbərlik edirlər".