İyunun 11-də start götürəcək futbol üzrə 2026-cı il Dünya çempionatında ən çox qol vuracaq komandanın hansı olacağı maraq doğuran mövzulardan biridir.

BAKU.WS-in məlumatına görə, ABŞ, Kanada və Meksikanın birgə ev sahibliyi edəcəyi mundial iyulun 19-da başa çatacaq. Turnir tarixində ilk dəfə 48 milli komanda iştirak edəcək.

Bukmeker şirkətləri artıq ən məhsuldar yığma ilə bağlı proqnozlarını açıqlayıblar.

Ən çox qol vurmaq ehtimalı olan komanda kimi İspaniya millisi göstərilir. Bukmekerlər bu komandaya 5.00 əmsal veriblər. İspanlar son illərdə hücum futbolu ilə diqqət çəkir və seçmə mərhələdə keçirdikləri bütün oyunlarda ən azı iki qol vurmağı bacarıblar.

Siyahıda ikinci yerdə Fransa millisi qərarlaşıb. 5.70 əmsalla qiymətləndirilən fransızların hücum xəttində çoxlu ulduz futbolçular yer alır. Komandanın əsas silahları arasında Kilian Mbappe və Usmane Dembele kimi oyunçular var.

İngiltərə və Braziliya milliləri isə 7.20 əmsalla üçüncü sıranı bölüşürlər. Hər iki komandanın heyəti güclü hesab olunsa da, bəzi mütəxəssislər onların hücumda müəyyən problemlərlə üzləşə biləcəyini düşünür.

İlk beşliyi Almaniya tamamlayır. Almanlara 8.20 əmsal verilib. Komandanın heyətində kifayət qədər ulduz futbolçu olsa da, klassik hücumçu çatışmazlığı əsas problemlərdən biri kimi göstərilir.

Lionel Messi və Kriştiano Ronaldonun komandaları da favoritlər sırasındadır. Dünya çempionu Argentina millisi 8.70, Portuqaliya isə 9.20 əmsalla qiymətləndirilib. Hər iki veteran ulduz artıq karyeralarının zirvə dövrünü geridə qoysa da, onların təcrübəsi və ətrafındakı keyfiyyətli heyət komandaların şanslarını artırır.

İlk onluqda həmçinin Niderland (16.0), Belçika (18.0) və Norveç (26.0) yer alıb. Xüsusilə Norveçin heyətində Erling Haaland kimi məhsuldar hücumçunun olması bu komandanı təhlükəli rəqibə çevirir.

Bukmekerlərin fikrincə, Kolumbiya, Meksika, ABŞ, Uruqvay və İsveçrə kimi komandaların ən məhsuldar yığma olması ehtimalı daha aşağı qiymətləndirilir.

Mütəxəssislərin böyük hissəsi isə turnirin ən çox qol vuran komandasının Fransa millisi ola biləcəyini düşünür. Buna səbəb komandanın zəngin hücum potensialı və böyük turnirlərdə qazandığı təcrübədir.