"Baku Steel Company" QSC (bundan sonra – BSC) ilə "İçərişəhər" Dövlət Tarix-Memarlıq Qoruğu İdarəsi arasında Xalq rəssamı Tahir Salahovun Ev-Muzeyinin yenilənməsi və rəqəmsallaşdırılması layihəsinə dair Anlaşma Memorandumu imzalanıb.

Memorandumu "İçərişəhər" Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud və BSC-nin Baş direktoru Kamal İbrahimov imzalayıblar.

Layihə çərçivəsində ev-muzeyin ekspozisiya məkanları, texniki infrastrukturu və memorial sahələri müasir muzey standartlarına uyğun yenilənəcək. Məqsəd Tahir Salahovun zəngin bədii irsinin qorunması, daha müasir təqdimat vasitələri ilə geniş auditoriyaya çatdırılması və ziyarətçilər üçün interaktiv muzey təcrübəsinin yaradılmasıdır.

Memorandumun imzalanması ilə bağlı çıxış edən "İçərişəhər" Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud Xalq rəssamı Tahir Salahovun Azərbaycan mədəniyyətində xüsusi yer tutduğunu qeyd edib. O bildirib ki, sənətkarın ev-muzeyinin müasir yanaşmalar əsasında yenilənməsi onun irsinin qorunması və daha geniş auditoriyaya təqdim olunması baxımından mühüm əhəmiyyət daşıyır.

BSC-nin Baş direktoru Kamal İbrahimov isə vurğulayıb ki, Tahir Salahov Azərbaycan təsviri incəsənətinin ən görkəmli nümayəndələrindən biri kimi milli mədəni irsimizin dünyada tanıdılmasında mühüm rol oynayıb. Onun sözlərinə görə, sənətkarın zəngin yaradıcılığının qorunaraq müasir təqdimat vasitələri ilə gələcək nəsillərə çatdırılması xüsusi əhəmiyyət daşıyır. Kamal İbrahimov qeyd edib ki, BSC milli-mədəni dəyərlərin qorunmasına və təbliğinə yönələn təşəbbüslərə dəstəyi korporativ sosial məsuliyyət fəaliyyətinin vacib istiqamətlərindən biri hesab edir.

ŞİRKƏT HAQQINDA

"Baku Steel Company" QSC Cənubi Qafqazın ən böyük metallurgiya müəssisəsidir. Müasir texnologiyalar əsasında fəaliyyət göstərən şirkət tikinti, infrastruktur, sənaye və neft-qaz sektorları üçün yüksək keyfiyyətli polad məhsulları istehsal edir. BSC-nin məhsulları beynəlxalq standartların tələblərinə cavab verir və ABŞ, Avropa İttifaqı və digər ölkələrin bazarlarına ixrac olunur.

Qalereya