ABŞ məhdudlaşdırıcı tədbirlərindən yayınma cəhdlərinə görə iranlı iş adamı Babək Zəncani ilə əlaqəli doqquz şirkətə və dörd fiziki şəxsə qarşı yeni sanksiyalar tətbiq edib.

BAKU.WS "Report"a istinadən xəbər verir ki, bu barədə ABŞ Maliyyə Nazirliyi məlumat yayıb.

Qurumun bəyanatına görə, sanksiyalar İranın "Dot One" konqlomeratına daxil olan strukturlara, B.Zəncani ilə əlaqəli və artıq sanksiyalar altında olan rəqəmsal birjaların fəaliyyətini dəstəkləyən, Türkiyə və Birləşmiş Ərəb Əmirliklərində qeydiyyatdan keçmiş bir neçə şirkətə şamil olunub.

Məhdudiyyətlər həmçinin bu şirkətlərin rəhbərlərinə qarşı da tətbiq edilib.

ABŞ Maliyyə Nazirliyindən bildirilib ki, B.Zəncani gəlirlərin yuyulması və vəsaitlərin İranın maraqları naminə gizli şəkildə köçürülməsi üçün maliyyə xidmətləri, rəqəmsal aktivlərlə ticarət, qızıl və qiymətli daşların hasilatı, eləcə də iri infrastruktur layihələrini özündə birləşdirən şaxələndirilmiş aktiv portfelindən istifadə edib.