"UEFA-nın FIFA bayrağı altında keçirilən turnirləri boykot etmək qərarı futbolun özü ilə deyil, təşkilatın fəaliyyətinin tənzimlənməsi ilə əlaqədardır".

AVESTA.AZ "Politico" nəşrinə istinadən xəbər verir ki, bunu Avropa Şurasının baş katibi Alen Berse deyib.

"Bu, sadəcə futbol məsələsi deyil. Bu qaydalar, onların kimin tərəfindən yazılması, necə tətbiq olunması və kimin onları dəyişdirmək hüququna malik olması ilə bağlı bir vəziyyətdir", - deyə o qeyd edib.

Berse, həmçinin vurğulayıb ki, "futbola səhmdar yox, qaydalar lazımdır".

O əlavə edib ki, sonuncu dünya çempionatı idarəetmə sistemindəki boşluqları üzə çıxarıb. Buna misal olaraq, Birləşmiş Ştatlar Prezidenti Donald Trampın FIFA rəhbəri Canni İnfantinoya zəngindən sonra ABŞ millisinin hücumçusu Folarin Baloqunun diskvalifikasiyasının ləğv edilməsi göstərilib.

Xatırladaq ki, bir müddət əvvəl FIFA prezidenti Canni İnfantinonun dünya çempionatının kommersiya hüquqlarının bir qismini özəl investorlara satmaq niyyətində olduğu məlum olub. FIFA-dan bildirilib ki, bu layihə sayəsində 4.2 milyard dollar cəlb etmək mümkündür.

Qeyd olunur ki, qurum ABŞ Administrasiyasına yaxın şəxslərlə bu barədə məsləhətləşmələr aparıb. Lakin bu təşəbbüs idman funksionerləri, federasiyalar və digər qurumlar tərəfindən kəskin tənqid edilib. Ardınca UEFA FIFA turnirlərini boykot etdiyini bəyan edib və bu qərar təşkilatın 55 üzvünün hamısı tərəfindən dəstəklənib. Eyni zamanda, sözügedən təklif Şimali, Mərkəzi Amerika və Karib Hövzəsi Ölkələri Futbol Konfederasiyasının (CONCACAF) üzvləri tərəfindən də rədd edilib.