Türkiyənin Milli Kəşfiyyat Təşkilatının (MİT) keçmiş əməkdaşı Kaşif Kozinoğlunun 12 noyabr 2011-ci ildə həbsxanada baş verən şübhəli ölümü ilə əlaqədar aparılan istintaq çərçivəsində məhkəmə nəzarəti altında sərbəst buraxılan həbsxana baş nəzarətçisi Ömer Vatanın ifadəsi məlum olub.

BAKU.WS xəbər verir ki, bu barədə "Haber Global" məlumat yayıb.

Məlumata görə, Vatan, Kozinoğlunun cəzaçəkmə müəssisəsinə qəbul edilməsi prosesindən, kamerada baş verən hadisələrdən və ölüm gününə aid gizli qalan məqamlardan danışıb.

Kozinoğlunun saxlanıldığı həbsxananın baş nəzarətçisi olan Ömər Vatan, mərhumun ilk vaxtlar tezliklə azadlığa çıxacağına inandığını bildirib. Əvvəlcə tək nəfərlik kamerada qalmaq istəyən Kozinoğlunun otağı gördükdən sonra "Mən burada qala bilmərəm" deyərək ərizə yazdığını diqqətə çatdıran Vatan, onun Hasan Atilla Uğur və Hasan Ataman Yıldırımın olduğu kameraya köçürülməsi mərhələsini izah edib.

Əldə edilən ifadəyə əsasən, Kozinoğlunun "Hasan Atilla Uğuru tanıyıram, problem olmaz" deməsindən sonra yerdəyişmənin baş tutduğunu qeyd edən Vatan, kameraya gedərkən Kozinoğlunun ona "Mən onsuz da tələyə düşmüşəm, sabah çox güman ki, buraxılacağam" dediyini vurğulayıb.

Söhbət əsnasında Hasan Atilla Uğur haqqında "Apo"nu gətirən komandir" kimi danışılmasına Kozinoğlunun etiraz etdiyini deyən Vatan, keçmiş MİT işçisinin "Xeyr, "Apo"nu biz gətirmişik, o sadəcə dindirmədə iştirak edib" cavabını verdiyini bildirib.

Vatan əlavə edib ki, Uğurun ürək xəstəsi olması barədə məlumatları olmayıb, yalnız sidiyindən qan gəldiyi üçün kameraya həkimlə birlikdə daxil olublar.

Uğurun xəstəxanaya göndərilmək məqsədilə vəziyyətini ağır kimi qələmə verdiyini iddia edən Vatan, həkimlə kameraya getdikləri günü belə xatırlayıb:

"Həkim otağa daxil oldu. Biz isə yuxarı mərtəbədə Kaşif bəylə söhbət etdik. Kozinoğlu mənə Uğur haqqında "Bu da özünü yalandan xəstəliyə vurur" dedi".

Kozinoğlunun vəfat etdiyi 12 noyabr 2011-ci il tarixində məzuniyyətdə olduğu üçün həbsxanada olmadığını söyləyən Vatan, həmin ərəfədə cəzaçəkmə müəssisəsini yoxlamağa gələn FETÖ üzvü müfəttişlərin onları hədəfə aldığını da sözlərinə əlavə edib.