
BƏƏ-də saxlanılan rusiyalı MMA döyüşçüsü Usman Nurmaqomedov və daha yeddi nəfərlə bağlı məhkəmə qərarı dəyişdirilib. Onların həbs cəzası pul cəriməsi ilə əvəz olunub.
AVESTA.AZ xəbər verir ki, bu barədə Əbu-Dabi Məhkəmə Departamenti sosial şəbəkə hesabında məlumat yayıb.
Bildirilib ki, oteldə baş verən kütləvi dava ilə bağlı mühakimə olunan səkkiz nəfərin cəzası tərəflərin barışması və zərərçəkmiş şəxsin apellyasiya şikayəti əsasında yüngülləşdirilib. Zərərçəkmiş şəxs təqsirləndirilən şəxslərin azadlığa buraxılmasını istəyib.
Yeni qərara əsasən, səkkiz nəfərin hər biri 150 min dirhəm (təxminən 70 min AZN) məbləğində cərimə ödəməlidir. Beləliklə, əvvəlki altı aylıq həbs cəzası pul cəriməsi ilə əvəzlənib.
Qeyd edək ki, Usman Nurmaqomedov noyabrın 11-də Əbu-Dabidəki otellərdən birinin foyesində keçmiş UFC çempionu Merab Dvalişvili ilə yaşanan münaqişədən sonra saxlanılmışdı. Hadisə ilə əlaqədar ümumilikdə səkkiz nəfər məsuliyyətə cəlb edilmişdi.
Bundan əvvəl keçmiş UFC çempionu Həbib Nurmaqomedovun əmisi oğlu Usmanın azadlığa buraxılması üçün Birləşmiş Ərəb Əmirliklərinin rəsmiləri ilə danışıqlar apardığı barədə məlumat yayılmışdı. Bildirilirdi ki, Həbib məsələni birbaşa həll etmək məqsədilə BƏƏ-yə yollanıb.
© 2021 AVESTA.AZ BÜTÜN HÜQUQLAR QORUNUR.
Sayt Ülvi Məmmədov tərəfindən yığılıb.