“Hazırda Azərbaycan-Qazaxıstan münasibətlərinin inkişafında müsbət dinamika müşahidə olunur”.

"Report" xəbər verir ki, bunu Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev Azərbaycan və Qazaxıstan arasında ikitərəfli münasibətlərə həsr olunmuş dəyirmi masada deyib.

Onun sözlərinə görə, iki ölkə nümayəndələrinin, hökumətlərarası komissiyaların və müxtəlif nazirliklərin fəaliyyətinin nəticəsi göz qabağındadır: “Ötən il tərəflər arasında keçirilmiş çoxsaylı görüşlər zamanı enerji, nəqliyyat və s. ilə bağlı məsələlər müzakirə edilib”.

F.Şəfiyev vurğulayıb ki, Azərbaycan Prezidenti İlham Əliyevin yaxın zamanda Qazaxıstana baş tutacaq səfəri ikitərəfli münasibətlərin inkişafında növbəti mərhələyə çevriləcək.

"Qazaxıstanda müşahidə etdiyimiz son müsbət dəyişiklikləri də qeyd etmək istərdim. Bura həyata keçirilən islahatlar, Qazaxıstanın Özbəkistan ilə sərhədlərinin tam delimitasiyası, təhlükəsizlik tədbirlərinin gücləndirilməsi daxildir", - o deyib.

BMTM İdarə Heyətinin sədri qeyd edib ki, Cənubi Qafqaz tarixi və iqtisadi cəhətdən Mərkəzi Asiya ilə bağlı olduğuna görə bu dəyişikliklər Azərbaycan üçün də mühüm əhəmiyyət kəsb edir.