Bunu açıqlamasında tanınmış müğənni Xuraman Şuşalı bildirib. O daha sonra əlavə edib.

“Anam bizim üstümüzdə hədsiz dərəcədə çox əziyyət çəkib, hətta ac qaldığı günlər olub. Bütün bu acılara dözüb 3 övladı boya-başa çatdırıb. Mən konservatoriyaya daxil olanda, orada oxuyanda, gəlib daşın üstündə oturub mənim dərsdən çıxmağımı gözləyirdi. Bütün imtahanlarımda həmişə yanımda olub. Məni Xuraman Şuşalı edən göydə Allah, yerdə anam olub. Bir tərəfdən onun yoxluğu ilə barışa bilmirəm, digər bir tərəfdən isə onu düşünürəm ki, mən anamın nazını çəkən övlad, xidmətində dayanan nökər olmuşam. Xınayaxdı məclislərində çox oluram. Orada böyük görəndə bilirəm ki, o ailənin ruzisi, bərəkəti var. Böyüksüz olan evin ruzisi, bərəkəti, birliyi bir olmur. Hansı evdə ki, böyük var o evin ruzi-bərəkəti aşıb-daşır. Çünki böyük yol göstərəndir. Düşünürəm ki, anam yanımda olsaydı daha böyük bir uğur əldə edərdim. Valideyn bir başqa uğur gətirir insana, ürəkli olursan. Anam məni ürəkli böyütmüşdü. Deyirdi görürsən ki, səni öldürürlər, ondan öncə vur sən öldür. Qabağını kəsiblərsə keç maşınla üstündən, qorxma, gəlib səni mən qurtaracağam. Onun belə deməyi məni ürəkli edirdi. İndi bu sözü deyənə də ehtiyacım var. Yaşlı qadınlar görəndə gedib qucaqlayıram, anamın iyini onlardan alıram və deyirəm ki, mənim üçün dua et. Çünki ananın duasına çox ehtiyacım var” deyə müğənni bildirib.

Xuraman Şuşalı şou-biznesdə çoxuşaqlı analara olan laqeyd münasibətdən də danışıb.

“Çox təəssüf ki, bu aləmdə normal ailəsi, övladı olan insanlara qəribə baxırlar. Onların bu baxış bucaqlarını anlaya bilmirəm. Söhbət təbii ki, şou-biznesdən gedir. Xarici ölkələrdə çoxuşaqlı ana olduğumu görüb hətta məni növbəsiz həkim qəbuluna da salırdılar. Şou-biznes aləmində əslində ona görə birtəhər baxırlar ki, hansı ağılla bu qədər yükün altına girmisən?! Mən sənətimlə ailə həyatımı birlikdə yürütməyi bacarıram. Təbii ki, yükü ağırdır, çətindir. Amma baxış bucağımızı dəyişməliyik. Mən ailə həyatı quranda, ana olmağa hazırlaşanda bilirdim ki, hansı yükün altına girirəm! Bunun həm əziyyəti, həm də ləzzəti var” deyə müğənni bildirib. (Moderator)