“Hədəfimiz I Liqada layiq olduğumuz birinci yeri tutaraq, Premyer Liqaya qayıtmaqdır”.

Bunu “AVESTA.AZ”a açıqlamasında I Liqa təmsilçisi “Şamaxı”nın yeni baş məşqçisi Ramiz Məmmədov deyib.

55 yaşlı mütəxəssis turnir cədvəlində 4-cü yerdə qərarlaşmaları ilə razılaşmayacaqlarını bildirib: “Sırf yerli uşaqlarla çıxışımızı davam etdirəcəyik. Komandanın durumu yaxşıdır, ab-hava normaldır. Düşünürəm ki, "Şamaxı"nın turnir cədvəlində hazırda qərarlaşdığı mövqe layiq olduğu yer deyil. Daha irəli getmək, konkret çempion olmaq istəyirik”.

R.Məmmədov Azərbaycan Kubokunda mümkün qədər irəliləməyi hədəflədiklərini vurğulayıb: “I Liqa komandasının gücü hara qədər çatırsa, kubokda ora qədər mübarizə aparacağıq. Ehtiyatda olan futbolçularımız var. Az şans qazanan uşaqlara da etimad göstərəcəyik ki, təcrübə toplasınlar”.

Baş məşqçi klubun İdarə Heyətində qalacağını da sözlərinə əlavə edib.

Qeyd edək ki, “Şamaxı” I Liqada 9 turdan sonra 15 xalla 4-cü pillədə qərarlaşıb. Komanda Azərbaycan Kubokunun II təsnifat mərhələsində, noyabrın 30-da səfərdə “Zaqatala” ilə qarşılaşacaq.