Mənzil İnşaatı Dövlət Agentliyi (MİDA) 2023-cü ili 8,101 milyon manat xalis mənfəətlə başa vurub.

“AVESTA.AZ” agentliyin maliyyə hesabatına istinadən xəbər verir ki, bu, 2022-ci illə müqayisədə 0,9 % azdır.

Ötən il MİDA-nın maliyyə gəlirləri 11,512 milyon manat (əvvəlki ilə nisbətən 6,1 % çox), diskontoun amortizasiyası üzrə gəlirləri 1,777 milyon manat (31,3 % az), ümumi və inzibati xərcləri 4,105 milyon manat (11,2 % çox), maliyyə aktivləri üzrə xalis dəyərsizləşmə gəliri 415 min manat (əvvəlki il zərər olub), sair gəlirləri 1 min manat (əvvəlki il olmayıb), mənfəət vergisi ödəmələri isə 1,499 milyon manat (1,2 % çox) təşkil edib.

Bu il yanvarın 1-nə MİDA-nın aktivləri 451,075 milyon manat olub ki, bu da illik müqayisədə 16 % azdır. Hesabat dövründə Agentliyin öhdəlikləri 40,9 % azalaraq 34,054 milyon manata, balans kapitalı isə 13 % azalaraq 417,021 milyon manata düşüb.

Xatırladaq ki, MİDA ölkə prezidentinin 11 aprel 2016-cı il tarixli fərmanı ilə yaradılıb. Onun nizamnamə kapitalı 100 milyon manatdır. Agentliyin əsas məqsədi ölkə vətəndaşlarının yaşayış sahələrinə olan ehtiyacını ödəmək, onların mənzil-məişət şəraitini yaxşılaşdırmaq, müasir memarlıq üslubunda ekoloji və enerji səmərəliliyi tələblərinə cavab verən çoxmənzilli binaların tikilməsini təmin etmək, habelə bununla bağlı şəhərsalma və tikinti sahələrində dövlət idarəetməsini təkmilləşdirməkdir. Bununla yanaşı, ölkədə çoxmənzilli yaşayış binalarının tikintisinə rəvac vermək, vətəndaşların güzəştlə mənzillər əldə etmələrinə şərait yaratmaq, çoxmənzilli yaşayış binalarının tikintisi üçün ayrılan maliyyə vəsaitlərindən səmərəli istifadə edilməsini təşkil və təmin etmək məqsədilə qurumun tabeliyində “MİDA” MMC yaradılıb.