Qazaxıstan 2030-cu ilə qədər tranzit yük daşımalarının həcmini hazırkı ildə 32 milyon tondan 74 milyon tona qədər, yəni 2,3 dəfə artırmağı planlaşdırır.

Bu barədə “Report”un Qazaxıstan bürosu nəqliyyat naziri Marat Karabayevə istinadən xəbər verir.

"Ötən il Qazaxıstan ərazisindən 32 milyon ton tranzit yük daşınıb. Bu göstəricinin artım tempi cari ildə 6 % təşkil edir (2024-cü il üçün plan 34 milyon tondur). Bununla yanaşı, bizim vəzifəmiz 2030-cu ilə qədər bu daşımaların həcmini 74 milyon tona çatdırmaqdır. Bu da hazırkı səviyyədən 2,3 dəfə çoxdur", - M.Karabayev dekabrın 23-də Məclisdə hökumətin səyyar iclasında çıxışı zamanı bildirib.

O xatırladıb ki, ölkə ərazisində 13 beynəlxalq nəqliyyat dəhlizi fəaliyyət göstərir, bunlardan beşi dəmir yolu, səkkizi avtomobil yoludur.

"Qərb və Şərq arasında yük axını 216 milyon ton, Şimal və Cənub arasında isə 206 milyon ton təşkil edir. Bununla belə pul dövriyyəsi 1 trilyon ABŞ dollarını ötür. Ümumi yük həcminin 93 %-dən çoxu dəniz nəqliyyatı, 4 %-i dəmir yolu nəqliyyatı ilə daşınır", - nazir bildirib.

M.Karabayev qeyd edib ki, son 10 ildə Çin istiqamətində yük axını üç dəfə artıb - 2013-cü ildəki 4,2 milyon tondan 2023-cü ildə 13 milyon tona çatıb. Çinin ümumi tranzit strukturunda payı hazırda 40 %-ə yüksəlib.