Varşavanın mərkəzində Polşa polisi kriminal dairələrdə "qanuni oğru" kimi tanınan, ən çox axtarılan gürcü cinayətkarlardan birini saxlayıb.

AVESTA.AZ xəbər verir ki, bu barədə RMF FM radiostansiyası məlumat yayıb. 

Əməliyyat Şredmestye (Śródmieście) rayonunda keçirilib. Saxlanılma zamanı onun üzərindən saxta pasport, yeddi ədəd odlu silah və 200-dən çox güllə aşkar edilib.

Hüquq-mühafizə orqanlarının məlumatına görə, o, çox güman ki, silah tətbiqi tələb olunan təhlükəli tapşırığı yerinə yetirmək üçün Polşaya gedib. Onun müvəqqəti yaşadığı ünvanda aparılan axtarış zamanı polis narkotik vasitələr və avtomobil oğurluqları zamanı tez-tez istifadə olunan radiosiqnal basdırıcı qurğular da tapıb.

Saxlanılan şəxs Şərqi Avropadan kənarda kriminal aləmdə əsas fiqurlardan biri hesab olunur. Hazırda onun Polşaya gəlməkdə hansı məqsədləri güddüyü və səfərinin arxasında kimlərin dayandığı araşdırılır.

Bundan əvvəl "qanuni oğru" Nika Gagrinski (əsl adı Dqebuaadze) Rusiya tərəfindən federal axtarışa verilmişdi. O, Rusiya Cinayət Məcəlləsinin 210.1-ci maddəsi - cinayət iyerarxiyasında yüksək mövqe tutmaq ittihamı ilə axtarılır.

Xatırladaq ki, bir müddət əvvəl Taqanskı mütəşəkkil cinayət qrupunun işi üzrə təqsirləndirilən şəxslər barəsində də məhkəmə hökmü çıxarılmışdı.