Yay mövsümündə çimərliklərə axın edən insanların sayı artır. Havaların isti keçməsi, suya olan ehtiyacı artırsa da, diqqətsizlik boğulma ilə nəticələnən faciələrə səbəb olur. Hər il Azərbaycanda onlarla insan dəniz, göl və ya hovuzda üzərkən həyatını itirir. Bu faciələrin əksəriyyəti sadə təhlükəsizlik qaydalarına əməl olunmaması səbəbindən baş verir.

BAKU.WS boğulmamaq üçün hər kəsin bilməli olduğu vacib məqamları təqdim edir:

1. Yalnız rəsmi çimərliklərdə üzün

Nəzarətsiz sularda boğulma riski qat-qat çoxdur. Rəsmi çimərliklərdə xilasedicilər, xəbərdaredici nişanlar və təcili yardım imkanları olur.

2. Dərinliyə getməyin

Öz bacarığınıza uyğun dərinlik seçmək həyatınıza bərabərdir.

3. Birdən-birə suya atılmayın

Xüsusilə bədən qızğın olanda soyuq suya tullanmaq ürək tutması və ani nəfəs itkisi ilə nəticələnə bilər. Əvvəlcə bədən isladılmalı, sonra suya daxil olunmalıdır.

4. Alkoqollu və ağır yeməkdən sonra suya girməyin

Alkoqol koordinasiyanı, qavrama və reaksiya qabiliyyətini zəiflədir. Ağır yemək isə suya girdikdə kramp riskini artırır.

5. Təklikdə üzməyin   Həmişə yaxınlıqda insanın olması təhlükə anında həyatınızı xilas edə bilər. Uşaqlar isə mütləq nəzarət altında olmalıdır.

6. Suda sancı tutduqda panikaya düşməyin

Əgər əliniz və ya ayağınız tutulursa, dərhal arxası üstə suyun üzərində uzanıb sakit qalmağa çalışın. Suda qalma bacarığı boğulma riskini azaldır.

7. Oyuncaqlara güvənməyin

Hovuz halqaları, şarlar və şişmə oyuncaqlar heç zaman real təhlükəsizlik vasitəsi deyil. Bunlar sadəcə əlavə əyləncədir, dayaq vasitəsi deyil.

8. Boğulanı tanıyın

Boğulan insan adətən səs çıxara bilmir, suyun içində batıb-çıxır, gözləri panik içindədir. Əgər belə bir hal görürsünüzsə, dərhal yardım çağırın.

9. İlk yardım və süni nəfəs qaydalarını öyrənin

Xüsusilə valideynlər və çimərlik işçiləri CPR (süni nəfəs və ürək masajı) bacarıqlarına malik olmalıdır. Bu, boğulan şəxsin həyatını xilas edə bilər.

10. Hər zaman ehtiyatlı olun – heç kim suda "peşəkar" deyil

Hava, suyun temperaturu, dalğa və axın şəraiti tez dəyişə bilər. Ən yaxşı üzgüçü belə, nəzarətsiz şəraitdə təhlükəyə düşə bilər.