Bakı Ağır Cinayətlər Məhkəməsi Ramana qəsəbəsində "Oba" marketin qarşısında baş verən qətl hadisəsi ilə bağlı hökm elan edib.

BAKU.WS-in məlumatına görə, 2008-ci il təvəllüdlü təqsirləndirilən şəxs 2024-cü il oktyabrın 1-də marketin kassiri işləyən Xəyal adlı şəxslə mübahisə zamanı onu bıçaqla vuraraq öldürüb.

Hadisə mübahisədən sonra, ictimai yerdə, insanların gözü qarşısında baş verib.

İttihama görə, təqsirləndirilən şəxs əvvəlcədən üzərində olan məişət bıçağı ilə Xəyala bir zərbə endirib. Zərbə nəticəsində mərhum daxili və xarici qan itkisindən ölüb. Məhkəmənin müəyyən etdiyi kimi, qətl xuliqanlıq niyyəti ilə törədilib. Hadisə marketin kameraları tərəfindən qeydə alınıb və videogörüntülərdə təqsirləndirilən şəxsin bıçaqla hücumu, eləcə də sonradan marketə qayıdaraq zərərçəkmişə qarşı aqressiv davranışı əksini tapıb.

Ekspertiza rəyinə görə, mərhumun ölümünə qarın boşluğuna endirilən dərin bıçaq yarası səbəb olub. Təqsirləndirilən şəxs hadisə zamanı sərxoş olub, lakin narkotik maddə qəbul etmədiyi müəyyən edilib. Psixiatrik ekspertiza onun anlaqlı olduğunu təsdiqləyib.

Məhkəmə yetkinlik yaşına çatmayan təqsirləndirilən şəxsin Cinayət Məcəlləsinin 120.2.2 (xuliqanlıq niyyəti ilə qəsdən adam öldürmə) və 221.3 (silah qismində istifadə olunan əşya ilə xuliqanlıq) maddələri ilə təqsirli olduğunu sübuta yetirib və ona 10 il müddətinə azadlıqdan məhrumetmə cəzası verib.

Hadisənin səbəbi isə cəmi 30 qəpik qalıq pul üstündə yaranan mübahisədən qaynaqlanıb.