"Hazırda Xəzər dənizinin suyunun duzsuzlaşdırılması ilə içməli su istehsalı sahəsində ölkəmizdə ilk pilot layihə həyata keçirilir".

Bu barədə BAKU.WS-in sorğusuna cavab olaraq Azərbaycan Dövlət Su Ehtiyatları Agentliyinin (ADSEA) mətbuat xidmətindən məlumat verilib.

Bildirilib ki, bu layihə Azərbaycan Respublikası Prezidentinin müvafiq Sərəncamına əsasən icra olunur.

"İqtisadiyyat Nazirliyi tərəfindən dövlət-özəl tərəfdaşlığı çərçivəsində elan edilmiş müsabiqənin nəticələrinə əsasən "ACWA Power" şirkətinin rəhbərlik etdiyi Konsorsium 1-ci yeri tutub. Sentyabr ayında Azərbaycan Dövlət Su Ehtiyatları Agentliyi və "ACWA Power" şirkəti arasında Xəzər dənizində suyun duzsuzlaşdırılması zavodunun layihələndirilməsi, tikintisi, istismarı və texniki xidməti üzrə saziş imzalanıb".

Məlumata görə, layihə Bakı şəhəri və Abşeron yarımadasının içməli suya artan tələbatını təmin etmək, şirin su mənbələrini şaxələndirmək və içməli su təchizatı sahəsində beynəlxalq təcrübəni və texnologiya transferini stimullaşdırmaq məqsədi daşıyır. Bu baxımdan, layihə əhalinin içməli su ilə təminatının yaxşılaşdırılmasına töhfə verəcək.

"Layihə çərçivəsində Sumqayıt Kimya Sənaye Parkında gündəlik istehsal gücü 300 min m³ su olan zavodun tikintisi planlaşdırılır. Müəssisənin 2,5 il ərzində tikilməsi nəzərdə tutulur. Zavodun tikintisi ilə bağlı müqavilə 1 ay öncə imzalanıb, yəni hələ layihənin icrasının ilkin işləri layihələndirmə və s. icra olunur. Bu baxımdan maya dəyəri və s. qarşıdakı dövrlərdə müəyyənləşdirildikdə və ya layihə ilə bağlı yeni məlumatlar olduqca ictimaiyyətlə bölüşüləcək", - deyə məlumatda vurğulanıb.

Banu Hüseynli