Belçikada fırıldaqçılıq işi çərçivəsində Avropa İttifaqının Xarici İşlər və Təhlükəsizlik Siyasəti üzrə sabiq Ali Nümayəndəsi Federika Mogerini həbs edilib.

AVESTA.AZ xəbər verir ki, bu, onun hazırda rəhbərlik etdiyi Avropa Kollecində diplomatik təlim proqramı ilə bağlıdır.

Onunla birlikdə daha iki şəxs də saxlanılıb, onlardan biri Avropa Xarici Əlaqələr Xidmətinin sabiq baş katibi Stefano Sanninodur. Hazırda Mogerini həbsdədir. İstintaq onun korrupsiya, maraqların toqquşması və peşə sirrinin pozulmasında şübhəli olduğunu bildirir.

Belçikada nəşr olunan "Le Soir" qəzeti xəbər verir ki, sabiq Avropa diplomatiyasının rəhbəri, hazırda Avropa Kollecinin rektoru olan Federika Mogerini fırıldaqçılıq və ədalətsiz rəqabət şübhəsi ilə Brüggedə saxlanılıb.

Qəzetin məlumatına görə, çərşənbə axşamı Brüsseldə Avropa İttifaqı diplomatik xidmətində və Brüggedəki Avropa Kollecinin bir neçə binasında AB vəsaitlərinin istifadəsi ilə bağlı mümkün fırıldaqçılığın araşdırılması çərçivəsində axtarışlar aparılıb.

Mogerinidən başqa, iki nəfər də saxlanılıb. Onlardan biri Avropa Xarici Əlaqələr Xidmətinin sabiq baş katibi italiyalı diplomat Stefano Sanninodur. Üçüncü şübhəlilərin adları açıqlanmır, yalnız bildirilir ki, o, Avropa Kollecinin meneceri, yəni Mogerininin işçisidir.

Avropa Prokurorluğu aparılan istintaq tədbirlərini təsdiqləyib və qeyd edib ki, axtarışlar Brüggedəki Avropa Kollecinin bir neçə binasında, Brüsseldəki Avropa Xarici Əlaqələr Xidmətində və şübhəlilərin evlərində aparılıb. Araşdırma 2021-2022-ci illərdə AB üzv ölkələrindən gənc diplomatlar üçün təşkil olunan doqquz aylıq təlim proqramına həsr olunub.

Avropa Prokurorluğu bildirib ki, proqramın həyata keçirilməsi üzrə tender zamanı Maliyyə qaydalarının 169-cu maddəsi – ədalətli rəqabət prinsipi pozulmuş və tenderdə iştirak edən namizədlərdən birinə mövcud satınalmalar barədə məxfi məlumat ötürülmüş ola bilər.

Axtarışlardan əvvəl hüquq-mühafizə orqanları bir neçə şübhəlini toxunulmazlıqdan məhrum etməyi tələb edib və bu tələb təmin olunub. Mümkün ittihamlar dövlət müqavilələrinin fırıldaqla bağlanması, korrupsiya, maraqların toqquşması və peşə sirrinin pozulması"ola bilər.

"Le Soir" qəzeti araşdırmanı Belçikanın Brügge şəhərinin yerləşdiyi Qərbi Flandriya bölgəsinin istintaq hakimlərinin apardığını qeyd edir. Axtarışları isə Belçika Federal Polisi həyata keçirib.

"Euroactiv" portalı şahidlərə istinadən bildirir ki, çərşənbə axşamı səhər saat 7:30-da Avropa Xarici Əlaqələr Xidmətinin qərargahına təxminən on mülki geyimli əməkdaş daxil olub. Portalın məlumatına görə, araşdırma həmçinin Avropa Kollecinin diplomatların yaşaması üçün Şpanjardstraat küçəsindəki binanı necə əldə etməsi ilə bağlıdır. Belə "yoldaşlıq evinin" mövcudluğu tenderdə iştirak üçün vacib şərt olub.

Qeyd edək ki, Federika Mogerini İtaliya və Avropa siyasətçisidir. 1973-cü ildə Roma şəhərində anadan olub. 2014-cü ilin fevralından İtaliyanın xarici işlər naziri olub. 2014-cü il noyabrın 1-dən 2019-cu il noyabrın 30-dək Avropa İttifaqının xarici işlər və təhlükəsizlik siyasəti üzrə ali nümayəndəsi olub.

2014-cü ildə o, Kiyevdə baş verən "Maydan" hadisələri, prezident Viktor Yanukoviçin devrilməsi və Krımın Rusiya tərəfindən ələ keçirilməsi ilə başlayan Rusiya-Ukrayna münaqişəsinin tənzimlənməsinə fəal şəkildə qatılıb. Mogerini bir neçə dəfə Kiyev və Moskva ilə danışıqlar aparmaq üçün səfərlər edib.

Avropa diplomatiyasının rəhbərliyindəki mandatının bitməsindən sonra 2020-ci ildə o, Brüggedəki Avropa Kollecinin direktorluğuna təyin edilib.